14-тӥ оштолэзе Юкаменск черкогуртын «Ашальчи Оки лыдӟонъёс» улосвылкуспо конференция радъяськоз. Ужрад сӥземын таланто син эмъясьлэн, усто кылбурчилэн, фронтовиклэн Ашальчи Окилэн 125 ар тырмонэзлы.

Конференциез радъяло «Удмурт Кенеш» но «Удмурт нылкышно кенеш» огазеяськонъёс, Йӧскалык политикая министерство но Юкаменск ёрос администрация юрттэмен.

«Ашальчи лыдӟонъёс» арлы быдэ ортчыло. Та ужрадлэн валтӥсь ужпумез –удмурт литератураез, удмурт калыклэсь историзэ тодон-азинтон, егитъёсты Удмуртиысь литература, культура, наука удысъёсысь дано адямиосын тодматон. Конференцие пырисько тодосчиос, журналистъёс, писательёс, калык огазеяськонъёслэн ёзчиоссы но егитъёс», – пусйиз Елена Миннигараева, «Удмурт нылкышно кенеш» огазеяськонлэн кивалтӥсез.

Лыдӟиськонъёсын кылбурчи сярысь тунсыко докладъёс чузъяськозы. Кылсярысь, Елена Миннигараева вералоз, марлы туала вакытэ но удмурт нылкышноослэн сюлэмъёсазы Ашальчи Оки улэ. Любовь Фёдоровалэн, педагогика тодосъя кандидатлэн, докладэз кылбурчилэн эмчи луон мылкыдэныз пыӵамын. Син эмъясь врач Апполинария Перевозчикова элькунысь трахомаез быдтон но Ашальчи Окилэн та удысын тыршемез сярысь ивортоз. Любовь Байкова Удмурт Элькунысь Шор кун архивысь кивалтӥсезлэн воштӥсез кылзӥськисьёсты Ашальчи Окилэн улон но ужан сюресэз архив документъёс пыр ивортодэтэн тодматоз. ГГПИ-ысь студентка Оксана Анчукова мадёз, кызьы егитъёс кылбурчилэн веросъёсыз шоры учко. Нош Владимир Векшин «Для меня она была просто тётей Линой» нимо темаен тодматоз.

Конференциын сӥё-дано сётӥське Ашальчи Оки нимо йӧскалык премия. Та данъетэн пусйисько шаерысьтымы адӟем карымон нылкышноос, кинъёс трос кужымзэс, дырзэс сёто анай кылмес, удмурт культурамес, тодос, дышетон, эм удысъёсты азинтонлы.