2022-тӥ ар понна йылпумъянъёс лэсьтыса, Элькунлэн Тӧроез Александр Бречалов Удмурт Кун филармониын «Признание» нимо премия сётӥз. Лауреатъёс пӧлы пыро пӧртэм удысужъёсысь адямиос, кудъёсыз ӧнерлыко но мер ужъёсын азинлыко тыршо. Озьы ик ужась коллективъёс, Удмуртиысь усточиослэн командазы, кудъёсызлэсь кичӧлтонъёссэс ар куспын улонэ пыӵатыны удалтӥз. Кылсярысь, «Признание» премиез басьтӥз «За жизнь» Православной мерлык движение, соин кивалтэ Анна Воскресенских.

Огазеяськон кылдэмын пӧсьтолэзе 2010-тӥ аре Ижкар но Удмурт митрополитлэн Николайлэн (Шкрумколэн) соглаш луэмезъя. Движение пӧртэм ӟечлэсьтон ӵектосъёсты огазея но асьсэды утьыны быгатӥсьтэмъёслы юрттэ: нылпиослы, улон интытэм адямиослы, ёрмись семьяослы но тужгес кышномуртъёслы, кудъёсыз шуг-секыт учыре сюризы. Аборт азьын визь-кенеш сётонъя кабинетъёслэн ужамзы озьы ик валтӥсь луэ.

Аборт азьын визь-кенеш сётонъя кабинетъёслэн ужамзы сэрен ог 150 нылпиез утьыны луиз. Тае вунэтонтэм вылысь, Ижкарысь Казанско-Богородицкой храмын символ пуштросъем писпу лэсьтэмын, кудаз котькуд фонарик – одӥг утем нылпи.

«Ваньмыз герӟаськемын адямилэн котырысь улонзэ воштон мылкыдыныз. Асьме огазеяськонэн трос пӧртэм ӟечлэсьтон ӵектосъёс радъясько. Котькудӥзлэн валтӥсь ужпумез – адямиослы ӟеч мылкыд кузьман но асьсэлы осконэз пыӵатон. Адями понна со зэмзэ но бадӟым юрттэт луэ. Мон туж шумпотӥсько «пичи подвиг»-мес кылӥзы шуыса. Ми понна со туж дуно», – пусйиз Анна Воскресенских.

Огазеяськонэн озьы ик радъяське «Мамино окно» нимо ӵектос, со сӥземын ёрмем семьяослы но кышномуртъёслы гуманитарной юрттэт сётонлы. Озьы ик шаерамы эриктэм улыны лыктэм муртъёслы юрттэт радъямын. Михаило-Архангельской кафедральной черк луэ гуманитарной юрттэт бичанъя одӥгез валтӥсь пункт.

«Признание» премия улсын огазеяськонлэн асмылкыдчиосыз, тыршыса лэсьтэм ужзы понна, «Удмуртия. Зарождение» нимо ӵектосэз улонэ пыӵатонлы сертификат басьтӥзы.