Удмуртиысь делегатъёс улосвылъёсын улӥсь удмуртъёслы ужрадъёсты радъян ужзэс азьланьто. Туннэ праздник радъяськиз Карлыганысь лулчебертъя юртын. Мыло-кыдо пыриськизы пиналъёс, дышетӥсьёс но йӧскалык-лулчеберет огазеяськонъёсысь азьветлӥсьёс.

Озьы ик ужрадэ вуэмын вал муниципал кылдытэтлэн кивалтӥсез, “Мари-Турек муниципал район” муниципал кылдытэтысь Депутатъёслэн Кенешсылэсь Тӧроезлэсь ужзэ быдэсъясь Лариса Яндыбаева, Марий Эл Республикаысь удмуртъёслэн национально-культурной центрзылэн тӧроез Валентина Козлова.

Удмурт калыклэн историеныз, лулчеберетэныз, выль удмурт проектъёсын герӟаськем нимысьтыз секциос ужазы.

Йӧскалык политикая министерствоысь калык кусыпъёсты умоятонъя ёзэтлэн кивалтӥсез Александр Корепановлэн верамезъя, таӵе ужрадъёс туж кулэ, уго соослы луыса палэнысь удмуртъёсын матынгес тодматскыны луэ. «Программамы воштӥське, озьы ке но ужрадмы котьку но тунсыко ортче. Шумпотӥсько палэнын улӥсь удмуртъёс понна сыӵе тунско ужрад ортчытыны луонлыкмы вань шуыса», – вера Корепанов А.Ю.

Ужрад яркыт концертэн йылпумъяськиз. Асьсэлэсь быгатонлыкъёссэс Удмуртиысь вуэм “Чебеляй” студиысь эктӥсьёс но Марий Элысь коллективъёс возьматӥзы.