8-тӥ куарусёнэ Калыкъёслэн Эшъяськон юртазы йӧскалык политикая министр пумиськиз мерлыко огазеяськонъёслэн кивалтӥсьёсынызы. Ужрадэ Удмурт Элькун Тӧролэн но Кивалтэтлэн Администрацизылэн кивалтӥсез А. И. Гальцин пыриськиз.

Йӧскалык политикая министр Л.Н. Буранова люкаськем калыкен ӟечбуръяськемез бере тодматӥз ужпумъёсын, кудъёсыз эскериськозы пумиськонын. Бӧрысь кыл сётэмын вал История, кылъя но литературая удмурт институтлэн директорезлы А.Е. Загребинлы.

Алексей Егорович тодматӥз Удмуртиысь калыкъёслэн ассамблеязылэн уженыз. Огазеяськонлэн валтӥсь меретэз – калыкез югдытон. Али Ассамблея ужа «Гостеприимная Удмуртия» книга поттон бордын. Та книга тужгес пайдаё луоз кӧчем калыкъёслы, тодматоз соосты асьмелэн элькунэнымы. Озьы ик А.Е. Загребин Ассамблеялэн мукет ӵектосъёсыныз но тодматӥз. Пумиськонын Ассамблеялэн Кенешаз ёзчиосты быръён но ортчытэмын вал. Кенешлэн тӧроезлэн воштӥсез «Удмурт Кенеш» ассоциацилэн кивалтӥсез И.Н. Семенов луиз, нош секретарь – УдГУ-ысь аспирант Д.В. Пузанов.

Л.Н. Буранова тодматӥз Йӧскалык ужпумъёсъя агентстволэн ужъёсыныз. Озьы ик люкаськемъёслы тодазы вайытӥз ёросъёсын Эшъяськон юртъёс кылдытон сярысь. Толэзьлэн кутсконаз Воткакарын йӧскалык лулчеберетъёсъя ивортодэт центр ужаны кутскиз. Матысь дыре таӵе ужъюрт усьтӥськоз Можгаын, нош 2016-тӥ арын – Гракын но Уваын. Министерствоысь ӧнрчи Е.А. Чуракова ивортиӥз ӵектосъёс бордын ужан сярысь. Министрлэн ваштӥсез Л.Ю. Соковикова вераз ёросъёсысь мерлыко огазеяськонъёслэн ёзчиосынызы пумиськонъёс сярысь. Пусйиз мерлыко огазеяськонъёслэсь кулэяськонъёссэс, шуг-секытъёссэс.