3-тӥ шуркынмонэ, Калыкъёслэн огазеяськон Нуналзылы но Удмуртилэн кунлык басьтэмезлы сӥзьыса, быдэс Россиын «Бадӟым этнографической диктант» тямысэтӥез Калыккуспо югдытон акция кутскиз (0+). «Калыкъёсмы трос, нош кунмы одӥг!» – таӵе лозунген 8-тӥ шуркынмонозь акция кыстӥськоз офлайн но онлайн амалэн – miretno.ru  официальной вотэсбамаз.

Ӵектос юрттэ Россиысь улӥсь котькуд калыклэсь аспöртэмлыксэ, историзэ, сям-йылолъёссэ утьыны но вӧлмытыны, йӧскалык лулчеберетсэ азинтыны. Со ваньмыз «Культура» йӧскалык проектлэн, Россия Федерациысь Президентлэн Владимир Путин кичӧлтэмен, быдэстоно азьмугъёсызлы юрттэт луэ.

УЭ-ын диктантэз 210 площадкаын гожтыны луэ. Валтӥсез соос пӧлысь – Ижкарысь Калыкъёслэн Эшъяськон юртсы. Ӵектослэн сӥё-буро усьтонэз отын ик ортчиз.

Ужрадэ 200-лэсь трос адями пыриськиз. Соос пӧлын – Удмурт Элькунысь Тӧро но Кивалтэт Администраци кивалтӥсьлэсь ужзэ быдэсъясь Александр Журавлев. Со ӟечкылаз вань люкаськемъёсты, шуд но бадӟым вормонъёс сӥзиз. Собере ваньмынызы ӵош пуксиз парта сьӧры, 30 дасям юанлы валэктон сётон понна.

«Нырысетӥяз «Бадӟым этнографической диктант» акцие пыриськи. Та кулэ луись югдытӥсь ӵектос асьме кунысь, элькунысьтымы улӥсьёсты Россиысь пӧртэм калыкъёслэн лулчеберетэнызы тодматэ, этнокультура сярысь тодон-валанъёсмес дунъяны быгатэ но азьланеныз тунсыкъяськытэ. Юанъёсыз макем паймымонэсь, вотэсын но валэктонъёс уд шедьты – учкыны уз луы. Калыкъёслэн Эшъяськон юртазы монэн ӵош диктантэз гожтӥзы УЭ-ысь йӧскалык-лулчеберетъя но «Движение Первых» огазеяськонъёслэн огмуртъёссы, депутатъёс, нимысьтыз ожгар операцие пыриськисьёс. Россиысь Президентлэн Владимир Владимирович Путинлэн косэмезъя асьме ожгаруж быдэсъясьёслы но соослэн семьяоссылы ми юрттэт сётӥськом, та выллем ужрадъёсы ӧтьылӥськомы – ведь ас вылын возьматэм пример – со тужгес но ужасез патриотизм мылкыдэз будэтонын. Кин ӧз на пыриськы «Бадӟым этнографической диктант» акцие, ваньзылы дэмласько», – ас малпанъёссэ вераз Александр Журавлев.

УЭ-ысь йӧскалык политикая министрлэн воштӥсез Людмила Соковикова ӵектослэн кылдэмез сярысь вераз:

««Бадӟым этнографической диктант» акция асьме дорын, Удмуртиын, 2016-тӥ аре кылдӥз. Соку 500 пала площадка гинэ вал, нош туннэ нуналлы – быдэс кунын 5000-лэсь трос. Ӵектосэз Россиысь вань улосвылъёс кутскыкуз ик умоен лыдъязы, со пумен паськытаз. Акция калыккуспо сяна, планетарной но луиз, малы ке шуоно 2017-тӥ арын диктантэз инсьӧрын (космосын) Калыккуспо космической станцилэн командаез но гожтӥз. Арлы быдэ пыриськисьёслэн лыдзы будэ. Кылем арын диктант акцие Россия Федерациысь 89 улосвылъёсысьтыз но 184 кунъёсысь 4 076 000 адями пыриськиз».

3-тӥ шуркынмонэ «Бадӟым этнографической диктант» акцилэн огаз площадкаяз пӧртэм удысъёсысь адямиос люкаськизы. Аслэсьтыз тодон-валанъёссэ эскерыны но пайдаё дырзэ ортчытыны Калыкъёслэн Эшъяськон юртазы вуиз нимысьтыз ожгар операцие пыриськись, «За Отвагу» медален данъетам, УЭ-ысь контракт амалэн ожгар службае мынон Быръён пунктысь старшой инструкторез Юрий Матвеев.

«Астэ кулэ вань удысъёсын будэтыны – мугорез но кыдатыны, йырвизез но азинтыны. Мон чик ӧй дасяськы, но асме эскереме потӥз. Таӵе акциос туж кулэ, уката ик туннэ нуналлы, Калыкъёслэн огазеяськон Нуналзы азьын, ведь юн огазеяськонын – милям кужыммы», – пусйиз Юрий Матвеев.

Озьы ик партаос сьӧрын Луганск но Донецк Калык Элькунъёсысь пиналъёс пукизы – «Родина – значит вместе» нылпиослы сӥзем ӵектослэн пыриськисьёсыз, кудзэ та нуналъёсы УЭ-лэн Тӧроезлы Александр Бречаловлы адӟытӥзы йӧскалык-лулчеберет огазеяськонъёсысь азьмынӥсьёсынызы пумиськонын. «Родина – значит вместе» ӵектослэн пыриськисез Екатерина Наговицына диктант гожтэмез бере ас мылкыдзэ вераз:

«Ми тодӥськомы вал, «Бадӟым этнографической диктант» гожтомы шуыса, соин ик ивортодэтэз тодэ вайытӥмы. Кылем арын кадь ик, куке нырысьсэ диктантэз гожтӥ, мон трос выльзэ тодӥ. Со тунсыко но туж кулэ».

Тодэ вайытомы, диктант Калыкъёслэн огазеяськон Нуналзылы сӥзьыса кунмылэн котькуд улосвылаз ортчытӥське.

Диктант 30 юанлэсь кылдытэмын, тест амалэн ортче. Солэн пуштросэз:

– 20 юан – быдэс Россия понна огкадесь юанъёс;

– 10 юан – Россиысь котькуд улосвыллэн аслаз юанъёсыз.

Оглом 100 балл люканы луэ. Ужез быдэстыны 45 минут сётӥське.

Пыриськисьёслы йылпумъянъёсын сертификатъёс соку ик дасямын луозы. 10-тӥ шуркынмон бере miretno.ru вотэсбамын электрон амалэн сертификат басьтыны луоз. Таяз аре но пыриськисьёс юанъёслэсь шонер валэктонзэс соку ик тодыны быгато, исторической справкаос сётэмын луозы ошмессинъёс вылэ ссылкаосын.

Ватсаломы на, ӵектос «Ассамблея народов Удмуртии» мерлыко огазеяськон но УЭ-ысь Йӧскалык политикая министерство кичӧлтэм улсын кылдӥз. Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ. Россиысь Тодосъёсъя академилэн Этнология но антропология институтэз но Урал ёзэтысьтыз история, кылъя но литературая Удмурт институтэз тодослыко юрттэт сётэ.