Удмуртиысь нимысьтыз окружной Верхнекамской казак огазеяськонлэн атаманэз Григорий Гусаров вераз, кызьы Эгра ёросысь 5-тӥ номеро школаын ужало казачей классъёс – 5-тӥ классысен 8-тӥ классозь.

«Егитъёсын ужанлы оглом бадӟым саклык висъяське. Пусйыны кулэ, вуоно казакез школа гинэ дышетыны-будэтыны уз быгаты, быдэс семья пыриськыны, сюлмаськыны кулэ. Шаерамы уло пӧртэм калыкъёс – удмуртъёс, бигеръёс, ми ваньмынызы умоесь кусыпъёс возиськом», – пусйиз со. Юрий Иванов йылтӥз на, казачество – со кужмо кивалтос ожгар но патриотизмо мылкыд пыӵатон удысын, та уж пыкъяське сям-йылолъёслэн, семьялэн, шаерлэн инъетъёссы вылэ: «Ожгар калыкмы милям трос, котькуд улосвылын солэн аслаз пӧртэмлыкъёсыз. Ми пӧлын вань сыӵеосыз, кинъёс вордскем шаермес утьыны султӥзы, куд-огъёсыз СВО-е ас мылкыдзыя кошкизы, мукетъёсыз контракт гожтӥзы. Ми мылысь-кыдысь юрттӥськомы соослы».

Али дыре казакъёс пӧртэм ужрадъёс ортчытъяло, ӵошатсконъёсы, фестивальёсы пырисько. Матысез пумиськон – 24-тӥ гудырикошконэ Самарской улосвылын, отын военной сборъёс радъяськозы. Отчы Удмуртиысь казакъёс но ӧтемын.

«Казачество тема мыным матын луэ. Солэн уженыз мон али тодматскисько школаосысь но СПО-осысь нимысьтыз классъёс пыр, озьы ик клубъёс, военно-патриотической ужрадъёсы пыриськись тунсыкчиос пыр. Арлыдо казакъёс шаермес утьыны спецоперацие кошкизы. Со понна бадӟым тау тӥляд ожгарчиостылы юн сюлэмо луэмзы понна. Матысь дыре эшшо одӥг пумиськон радъяломы на, отын пыр-поч эскеромы азьланяз ӵош ужан планъёсты, дэмланъёсты», – вераз Александр Журавлев.

Тодэ вайытоно, Ижкарын, Эгра, Балезино ёросъёсын, Можгакарысь агропромышленной колледжын казак классъёс но нимысьтыз клубъёс вань. Отысь егит казакъёс пӧртэм ёрос но элькун ужрадъёсы пырисько. Соос пӧлын, кылсярысь, «Свеча Памяти», тодэ ваёнлы но кайгулы сӥзем митинг, Вормон нунал, локальной ожгаръёсы пыриськись ветеранъёслы сӥзем нунал. Кадетъёслы дышетон ужъюртъёсын ортчытъясько сӥё-дано присяга сётонъёс, спортъя ӵошатсконъёс, ожгар-патриотизм пуштросо ужрадъёс.