Туннэ йӧскалык политикая министр но Азербайджан Элькунысь делегация куспын пумиськон ортчиз.

Эдуард Петров министерстволэн ужамез сярысь вераз, ивортӥз, УЭ-ысь 87%-эз улӥсьёс йӧскалык кусыпъёсты умоен лыдъяло шуыса.

Министр пусйиз арлы быдэ ортчись ӵектосъёсты, кудъёссэ «Достуг» Азербайджан огазеяськонэн радъя – «Тон мынам крезьгуре» вожвылъяськон, кудӥз сӥземын СССР-ысь калык артистлы Муслим Магомаевлы, шашкаосын турнир, озьы ик шуге-леке сюрем адямиослы юрттэт сётон.

Азербайджан Элькунысь диаспораен ужанъя Кун комитетъя департаментлэн начальникезлэн воштӥсез Байталов Али тау кариз Удмурт Элькунэз мыло-кыдо пумитамез понна. Озьы ик тау кылъёс верамын вал Министерстволы йӧскалык кусыпъёсты азинтонын бадӟым уж нуэмез понна. Со аслэсьтыз осконзэ пусйиз, Удмурт на Азербайджан Элькунъёслэсь кусыпъёссэс муромытыны луэ на шуыса.

Пумиськонын вал Анастасия Лаврина, Азербайджан СМИ-лэн огмуртэз, политолог, Азербайджанысь Ӟуч Дэменлыклэн председателезлэн воштӥсез. Со умоен лыдъяз УЭ-ын улӥсь йӧскалыкъёс вискысь кылдэм кусыпъёсты. Анастасия Лаврина дэмлаз элькунъёсамы журналистика удысэз муромытыны, ог-огмылэн ужаммы но практикаосмы сярысь тросгес ивор сётъяны.

21-тӥ коньывуонэ Калыкъёслэн Эшъяськон юртазы сӥё-буро ужрад ортчоз, кудӥз «Удмурт Элькунысь “Достлуг” Азербайджан мерлыко центр» Улосвыл мерлык огазеяськонлэн 25 ар тырмонэзлы сӥземын луоз. Та ужрадэ Азербайджан Элькунысь бадӟым куноос ӧтемын.