Удмуртиын но бускель улосвылъёсын котькуд ар ортчись «Бадӟым удмурт диктант» югдытӥсь акция ортчиз. Туэ ужрад Кузебай Гердлэн но Ашальчи Окилэн 125 ар тырмонзылы но Удмурт Элькунын 2023-тӥ аре ортчись Егитъёслэн арзылы сӥземын вал.

«Ужлы сётӥськон» нимо текстэз егит журналист но прозаик Мария Векшина гожтӥз. Ашальчи Окилэн но Кузебай Гердлэн улон сюрессы но творчествозы сярысь нимысьтыз тест Удмурт кун университетлэн удмурт кылосбуръя, финно-угроведениея но журналистикая институтысьтыз ӧнерчиос дасязы.

Акция Удмуртиысь 140 но бускель улосвылъёсысь 35 площадкаосын радъяськиз. Огдышемъя текстэз «Мынам Удмуртие» радиоын но «Удмуртия» телеканалын лыдӟизы.

Диктант гожтыны мылкыд каризы элькунысьтымы 29 муниципал но кар округъёс, но озьы ик Башкортостанысь, Татарстанысь, Пермьысь, Кировысь но Москваысь улосчиос.

Лыдъям-чотамъя ог 2827 адями ужрадэ пыриськиз (нимысьтыз площадкаосын гожтӥз 2228 адями, онлайн амалэн – 599 адями). Соос пӧлысь тужгес но егитэз вал Татарстанысь 7 аресъем улосчи. Пичи Пурга ёросысь 83 аресъем кышномурт тужгес но арлыдоез луиз.

Ужъёсты УдГУ-лэн удмурт кылосбуръя, финно-угроведениея но журналистикая институтысьтыз дышетӥсьёс но ӧнерчиос эскеризы. 83 адями диктантэз одӥг янгыштэк но гожтыны – 100 бал люканы – быгатӥз.

Электрон сертификатэз басьтыны луоз 15-тӥ куартолэзьысен диктантлэн вотэсбамаз https://www.udmdiktant.ru/