2-тӥ оштолэзе радъяськиз арлы быдэ ортчись «Бадӟым удмурт диктант» акция. Туэ ужрад Дышетсконлэн арезлы сӥземын вал. Диктантлы текст «Кенеш» журналлэн валтӥсь редакторез, егит удмурт кылбурчи Анастасия Шумилова гожтӥз.

Диктантэз элькунын 125 площадкаын гожтӥзы, Удмуртилэн палэназ 30 площадка ужаз. Со сяна, текстэз «Мынам Удмуртие» радиоын но телевидениын лыдӟизы. Акцие Удмуртиын вань ёросъёсысь, Башкортостанысь, Татарстанысь, Марий Элысь, Пермьысь но Владимир улосъёсысь, Мускоысь но Санкт-Петербургысь удмуртъёс париськизы.

Радъясьёслэн лыдъямзыя, туэ диктант 2943 адями гожтӥз (2300 адями площадкаосын гожтӥз, 643 адями – радио но телевидение пыр). Ужъёсты Удмурт кун университетысь Удмурт кылосбуръя, финно-угорведениея но журналистикая институтысь дышетӥсьёс эскеризы. 92 адями диктантэз янгыштэк гожтӥзы но 100 балл басьтӥзы.

Диктант понна кöня балл басьтэмдэс но электронной сертификат басьтыны луоз 16-тӥ куартолэзьысен https//www.udmurtdiktant.ru вотэсбамын.