Котькуд ар УЭ-ысь йӧскалык политикая министерство ёросъёсын «Миннацлэн нуналэз» ужрад ортчытъя. Туннэ министерствоысь ужасьёс но министр Эдуард Петров Балезиноысь улосчиосын пумиськизы.

«Ужрадэз ортчытон улсын, ми улосчиосты министерстволэн уженыз, Кун йӧскалык политикалэн Стратегиезлэн ужпумъёсыныз тодматӥськомы. Дышетон семинаръёс, тематической но проектной секциос ортчытӥськомы, улосчиосын пумиськиськомы. Со сяна, дышетӥсьёсты, завучъёсты, анай-атайёсты терроризмен но экстремизмен нюръяськонъя ивортодэтэн тодматӥськомы», – пусйиз министр.

Балезино ёросын пумиськон пайдаё ортчиз.

Пыриськисьёслы ӟечкылан кылъёсын вазиськиз Балезино ёрослэн Тӧроез Юрий Новойдарский. Докладаз мерлык, экономика, политика, йӧскалык удысъёсысь азинсконъёсын но йылпумъянъёсын тодматӥз.

Йӧскалык политикая министр Эдуард Петров Министерстволэн ужез, вуоно ар понна валтӥсь ужпумъёсыз но азьмугъёсыз сярысь вераз. Пусйиз, Балезино ёросын трос тунсыко ӵектосъёс радъясько: «Легить тур» бесерман егитъёслэн ёроскуспо турслётсы, «Род Касимовых» Улосвылкуспо фестиваль, «Удмуртская открытка» ӵектос но «Огни Дондыдора» ӵектосэ пыриськон.

Со сяна, министр синйылтӥз: Балезиноын улӥсьёс бадӟым саклык висъяло калыкъёслэсь кылъёссэс, лулчеберетсэс, ӟеч кусыпъёссэс утён но азинтон удысъёслы. Талы луыса, муниципал кылдытэтъёсын ог 20 дышетон ужъюртъёс удмурт но бигер кылъёсты дышето.

Коммерциен герӟаськымтэ огазеяськонъёсысь огмуртъёслы, лулчеберет, дышетон, егитъёсын ужан политика удысъёсысь ёзчиослы ӵектосъёсъя семинар ортчытэмын. Секциез нуиз Лариса Князева, Калыкъёслэн эшъяськон юртысьтызы ужась. Ёросын та ӧнеръя бадӟым уж нуиське. Кылсярысь, «ЗАСТАВА» огазеяськон таӵе патриотизмо ӵектосъёс радъя: «Здоровая семья – будущее России!», Вӧёгуртын шаертодонъя (краеведческой) музей кылдытон. Та проектъёс Президентлэн фондысьтыз грант утыны быгатӥзы. Пусъем огазеяськонэн валче, ужзэ мылысь кыдысь нуэ Балезино ёросысь «Вместе» коммерциен герӟаськымтэ огазеяськон.

Семинар ортчем бере УЭ-ъя Минюстысьтыз Кивалтэтлэн огмуртэз Анна Ковешникова «ликбез» ортчытӥз но коммерциен герӟаськымтэ огазеськонъёслэн эрикрадъя ужамзы сярысь юанъёсты сэрттӥз-пертчиз.

Дышетон ужъюртъёсысь ӧнерчиослы «Колумбайн. Опасное деструктивное явление» докладэныз тодматӥз Удмурт Элькунысь Тӧролэн но Кивалтэтлэн Администрациезлэн терроризмлы пумит ужез радъянъя ёзэтлэн кивалтӥсез Олег Кузнецов но солэн воштӥсез Ольга Меркушева.

УЭ-ысь йӧскалык политикая министрлэн воштӥсез Людмила Соковикова пыр-поч эскериз муниципал кылдытэтъёсысь этносоциальной югдуръёсъя юанъёсты.

Озьы ик, Министр кунмуртъёсын нимысьтыз пумиськон ортчытӥз. Эдуард Степанович улӥсьёсын вераськиз но сюлмаськытӥсь юанъёслы валэктон сётӥз.

«Тау кылъёс вераме потэ командаелы но тӥледлы, гажано улосчиос, ужрадэ мылысь-кыдысь пыриськемды, трос калыкъем Удмуртиын эшъяськонлэсь кулэлыксэ валамды понна», – йылпумъяз Эдуард Петров

Вуоно «Миннацлэн нуналэз» ужрад пӧсьтолэзе Якшур-Бӧдья ёросын ортчоз.