21-тӥ тулыспалэ Анай кыллэн калыккуспо нуналыз. Дышем сямен ини, та нуналэ «Шунды» мерлыко огазеяськон «Вераськисько анай кылын» акция ортчытоз.

Та ужрадлэн аслаз историез. Нырысетӥ аре «Шунды» огазеяськонлэн ёзчиосыз Ижкарын Шор площадьын калыкъёслы удмурт-ӟуч кыллюкамъёс сётъязы, мукет аре – «Мон вераськисько удмурт кылын» гожтэм значокъёс. Кылем аре акцилэн географиез паськытаз – ёросъёсы вуиз.

Туэ егитъёс выль формат малпазы – машинае лякыны удмурт кылын наклейкаос дасязы. Толшоре вотэсбамын соиз яке таиз предложение понна куара сётон радъямыннн вал. Тужгес но трос куара люказы таӵе веранъёс:”Сюрес усьтӥське мынӥсьлы”, «Вамыштоно ке, мед кылез пытьы!», «Дыртӥсь таракан пуртые усе». Наклейкаосты сётъялозы Алнаш, Грак, Пичи Пурга, Якшур-Бӧдья, Шаркан ёросъёсын но Ижкарын машина пуктыны чаклам интыосын.