Фестивале Россиысь но кунгож сьӧрысь 19 коллективъёс пыриськизы. Котькуд ар фестивальлэн темаез вошъяське, туэ со гурлы сӥземын вал.

Люкаськем калыкез ӟечкылазы «Дэри ёрос» муниципал кылдытэтлэн тӧроез – Андрей Владимирович Коняшин, Удмурт Элькунысь лулчеберетъя но туризмъя министр – Владимир Михайлович Соловьев, Калыкъёслэн эшъяськон юртсылэн кивалтӥсез – Боталова Татьяна Павловна, Вань удмуртъёслэн «Удмурт Кенеш» ассоциацизылэн вице президентэз – Алексей Васильевич Серебрянников.

Нырысь ик куноос ӟуч этнографлэн, фольклористлэн Д.К. Зеленинлэн вордӥськем гуртаз, Люке, вуылӥзы. Черке, музее пыразы. Бӧрысь Дэрие берытскизы. Фестивальын «Зеленинские чтения», «Напевы у печки» площадкаос, «Современные тенденции развития фестивального движения в Российской Федерации» лаборатори ужазы. Котькудӥзлэн ужазы рос-прос, мур пуштросъем но тунсыко пӧрмиз. Нырысьсэ фестивале егитъёслэн коллективъёссы пыриськизы.

Эктон но кырӟан сяна, фестивальын пӧртэм пумо мастер-классъёслэн ужзы радъямын вал, учыкны луиз кибашлыослэсь ужъёссэс, нош «У самовара» площадкаын котькинэ ческыт чаен но пӧсь табанен куноятӥзы.