«Бадӟым этнографической диктант» Калыккуспо югдытон акцие пыриськиз онлайн амалэн 3,3 миллион адями, соос пӧлысь 32 009 – Удмурт Элькунысь. Та сярысь 22-тӥ шуркынмонэ пресс-конфренциын йӧскалык политикая министр Эдуард Петров журналистъёслы вакчияк вераз.

Со тодэ вайытӥз, ӵектослэн ужпумъёсыз – элькунысь, кунысь, пӧртэм кунъёсысь улӥсьёслэсь этнокультура сярысь тодон-валанъёссэс дунъяны, пӧртэм калыкъёслэн историенызы но лулчеберетынызы тунсыкъяськытыны. Ваньмыз соос «Культура» йӧскалык ӵектослэн азьмугъёсызлы тупало, кудзэ кичӧлтӥз Россилэн Президентэз Владимир Путин.

Акция тямысетӥ ползэ ини трос адямиосты герӟаз – арлыдзыя, дышетскемзыя, осконъёссыя пӧртэм муртъёсты. Вань мылкыд карисьёс 3–8-тӥ шуркынмонэ гожтыны быгатӥзы онлайн амалэн – miretno.ru официальной вотэсбамын но нимысьтыз площадкаосын, таяз аре соос Удмуртиын 210 дасямын вал. Элькунысьтымы площадкаосын 6 730 адями диктантэз гожтӥз. Акцилэн йылпумъянъёсыз лэсьтӥсько на, 2023-тӥ аре 12-тӥ толсуре соос тодмо луозы.

«Акциез радъян йӧскалык-лулчеберето огазеяськонъёслэн юрттэменызы умой ортчиз, соос шумпотыса диктантэз дасянлы но ортычонлы юрттӥськизы. Ми паймемын вал пыриськисьёслэн дасяськемзылы но соослэн этнографи удысын мур тодон-валанзылы. Нимысьтыз тау вань асмылкыдчиослы, кудъёсыз туж умой асьсэ ужзэс быдэстӥзы но эшлыко мылкыд кылдытӥзы», – вераз Удмурт Элькунысь йӧскалык политикая мониторингъя но йӧскалык кусыпъёсты эскеронъя ёзэтлэн кивалтӥсез Лариса Нигматзянова.

Тодэ вайтомы, юанъёслэсь шонер валэктонзэс соку ик miretno.ru вотэсбамын тодыны луэ вал, исторической справкаос сётэмын ошмессинъёс вылэ ссылкаосын, отын ик электрон амалэн сертификат басьтыны луэ. Пыр-поч ивортодэт сётэмын ӵектослэн ивортодэто ресурсаз. Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ, нош УЭ-ын – йӧскалык политикая министерство но Калыкъёслэн Эшъяськон юртсы.