Удмуртиын «Содружество» премия этнокультураез азинтон удысын но Россиысь калыкъёслэсь огкыл тупаса улонзэс юнматонын нырысьсэ ортчытӥське. 13-тӥ толшоре Калыкъёслэн Эшъяськон юртазы 7 номинациосын лауреатъёсыз шараямын.

Данъетамын элькунлэн мыло-кыдо улӥсьёсыз, кудъёсыз 2024-тӥ арлэн пумаз вожвылъяськонлэн быръёназ пыриськизы. Премиез радъясьёс – Удмурт Элькунысь йӧскалык политикая министерство, Калыкъёслэн Эшъяськон юртсы, Мерлык палата но «Россиысь калыкъёслэн ассоциацизы»-лэн улосвыл ёзэтэз.

«Вожвылъяськонэ анай кылъя дышетӥсьёслэсь, устолыкъя дэменлыкъёслэсь, журналистъёслэсь но блогеръёслэсь 53 заявка вуиз. Лауреатъёслэсь ӵектоссэс «Гордость нации» Россиякуспо премие дэмлаломы. Элькунмы пыриськиз ни та ужрадэ – Калыкъёслэн Эшъяськон юртсы 2023-тӥ арын вормись луиз. Ваньдылы тау карисько элькун премиез утонэ пыриськемды понна но азьляняз эшшо но бадӟым вормонъёс», – вераз Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев.

«“Содружество” премия бадӟым ужрад луэ йӧскалык политика удысын. Со мыло-кыдо адямиослэн но огазеяськонъёслэн ужъемышсы. Валтӥсь ужпум – Россиысь калыкъёслэн огъя улэмзы но эшъяськонзы понна тыршон. Туннэ тужгес но устоосыз пӧлысь устоосыз данъет басьтӥзы этнокультура удысэз азинтон но кунамы калыкъёс куспын тупаса улонэз юнматон понна», — вераз йӧскалык политикая министр Эдуард Петров.

«За вклад в укрепление межнационального (межэтнического) мира и согласия» номинациын лауреат луиз «Одо Мари Ушем» Удмурт Элькунысь поръёслэн мерлыко огазеяськонлэн но «Ижевск Мари» поръёслэн кар мерлыко огазеяськонлэн кивалтӥсез Николай Ямаков;

«За вклад в сохранение и развитие родных языков» номинациын –  Вавож ёросысь Ӟозлуд-Какся школаысь удмурт кылъя но литературая дышетӥсь Елена Рублева, А.Л. Широких нимо 13-тӥ номеро огъядышетонъя шоръёзо школаысь покчи классъёсты дышетӥсь Эльвира Каерова но Глаз ёросысь Дондыкар школаысь удмурт кылъя дышетӥсь Раиса Резенова;

«За вклад в информационное сопровождение государственной национальной политики» номинациын – Глазкарысь «Иднакар» газетлэн валтӥсь редакторез Альбина Бушмакина;

«За лучший проект национально-культурных объединений Удмуртской Республики в сфере межнациональных (межэтнических) отношений» номинациын – Глазкарысь 11-тӥ номеро школаысь педагог-организатор Ирина Касимова;

«За лучшие практики Домов дружбы, Домов и центров народного творчества и иных учреждений, осуществляющих деятельность в области межнациональных отношений» номинациын – Элькун калык устолыкъя юртысь «Встреча» киностудилэн кивалтӥсез Анатолий Добряков, Сарапулысь лулчеберетъя «Электрон» дворецысь ӟуч лулчеберетъя валтӥсь методист Татьяна Сарычева;

«За вклад в сохранение и развитие культуры народов России (народное творчество, национальные виды спорта, народные промыслы и ремесла, этническая мода и этнический туризм)» номинациын – Шаркан ёросысь «Вортча» улосвыл ёзэтысь улӥсь Анастасия Чазова, Кияса ёросысь Уддяди гуртысь Удмурт лулчеберетъя центрлэн директорез Елена Белослудцева, «Перепечкин» огазеяськонлэн кивалтӥсьёсыз Алексей но Ирина Вотинцевъёс.

«За эффективное лидерство в национально-культурных объединениях Удмуртской Республики» номинациын – Удмурт Элькунысь Бигеръёслэн йӧскалык-лулчеберетъя автономизылэн кивалтӥсез  Рамзия Габбасова.