«Ёлка желаний» нимо ӟечлэсьтон акцие УЭ-ысь йӧскалык политикая министр Эдуард Петров пыриськиз. Выль ар кыз вылысь со басьтӥз дас аресъем Валялэсь льӧль малпан-куронзэ. Нылмуртлэн УЭ-ысь Кун Мунё театре экскурсие ветлэмез потэ вылэм.

Солэн малпанэз меӵак Выль Ар азьын быдэсмиз – эшъёсыныз ӵош нылаш лулчеберетъя ужъюртлэн катанчи сьӧраз вуиз, цехъёслэн уженызы тодматскиз. Валя – туж мылкыдо адями, крезьгурен тунсыкъяське – Удмурт Элькунысь устолыкъёсъя нылпи школаын дышетске, флейтаен шудэ.

«Пиналъёс туж бадӟым тунсыкен театрлэсь дуннезэ эскеризы. Шумпотыса таӵе мылпотонэз быдэстӥ – льӧль малпанъёс зэманы кулэ, уката ик нылпиослэн малпанъёссы. Та бордын праздниклэн аспӧртэм магиез – мукет адямиосты шудогес карыны», – пусйиз Эдуард Петров.

Тодэ вайытомы, «Ёлка желаний» нимо ӟечлэсьтон акция арлы быдэ Удмуртиысь 500-лэсь трос нылпиослэсь мылпотонзэс улонэ пыӵатыны юрттэ. Элькун ӵектослэн кутсконэз таяз арын Москваын ВДНХ-ын Элькунлэн нуналэз дыръя 5-тӥ толсуре ортчиз, Удмурт Элькунлэн Тӧроез Александр Бречалов солы старт сётӥз. Акцилэн пыриськисьёсыз – таланто, шуге-леке шедем пиналъёс, нимысьтыз ожгар операцие пыриськисьёслэн нылпиоссы но Луганск Калык Элькунысь Лугутинской ёросысь пиналъёс. «Россия» адӟытон-форуме (0+) вуылон дыръяз Россиякуспо «Ёлка желаний» нимо акцие кунмылэн Президентэз Владимир Путин пыриськиз.