Кунмылэн Азьмуртэныз ялэм Россиысь калыкъёслэн огъя луэмзылэн араз «Удмурт фантастика» вожвылъяськон кутскиз. Ӵектосэз Йӧскалык прессалэн юртэз, «Кенеш» журналлэн редакциез улонэ пыӵатэ УЭ-ысь Кивалтэтлэн юрттэменыз.

Пыриськыны быгато удмурт кылын гожъяськись авторъёс но Россиысь калыкъёслэн кылъёсысьтызы удмурт кылэ берыктӥсьёс. Ужъёсты кутон 2026-тӥ арын 8-тӥ инвожоысен 8-тӥ куарусёнозь мыноз. Соослэн пуштроссы но образъёссы сӥземын кулэ Россиысь калыкъёслэн огъя луэмзылэн арезлы.

Озьыен, авторъёс кык номинациын куриськонъёссэс сётыны быгато:

«Фантастика (фэнтези) жанрын устоез верос» — удмурт кылын гожтэм произведение;

«Россиысь калыкъёслэн кылъёсысьтызы фантастика (фэнтези) жанрын устоез берыктэм верос» (ӟуч кыл но лыдэ басьтӥське).

Одӥг ужлэн быдӟалаез — пробелъёсын ӵош 13 сюрс пуслэсь ӧжыт медаз лу. Котькуд номинациын быдэн куинь вормись быръемын луоз, соос коньдон сертификат басьтозы.

«Шумпотымтэ, туала удмурт литература традиционной жанръёсын гинэ пушказ пытсаськыса уг улы шуыса, со выль творческой инвисъёслы кышкатэк усьтӥське. Фантастика жанр авторъёслы асьсэды возьыны паськыт луонлыкъёс сётэ но йӧскалык лулчеберет пыр туала дунне выль синмын учкыны юрттэ», – ватсаз Удмурт Элькунысь Кун Кенешлэн Тӧроезлэн воштӥсез, Удмурт Элькунысь Кун Кенешысь тодосъя, дышетонъя но граждан мерлык институтэз азинтонлы юрттэт сётонъя ялан ужась ӧрилэн кивалтӥсез Татьяна Ишматова.

«Вожвылъяськонлэн лэсьтэм йылпумъянъёсыз бере бичет поттэмын луоз, кудӥз лыдӟисьёсты туала но вашкала (классической) удмурт фантастикалэн устоосыныз образецъёсыныз тодматоз. Книга вуоз элькунысь лыдӟетъюртъёсы, лулчеберет но дышетон ужъюртъёсы, кытын соин вань мылкыд карисьёс тодматскыны быгатозы», — вераз «Кенеш» журналлэн валтӥсь редакторез Анастасия Шумилова.

Вожвылъяськонлэн куронъёсыз но дырыз, кузьымъёс но ужъёслы тупатэм куронъёс сярысь тодыны луэ положениысь, «Кенеш» журналлэн редакцияз электрон почта пыр kenesh-udm@yandex.ru яке мерлыко вотэсъёс пыр вазиськыса.

Туспуктэм: Сергей Рогозин.