Бускель калыкъёс куспын эшлыко мылкыд кылдытон – ӟеч мерлыко улонлэн инъетэз.

Фестивальёс но этнокультура удысысь ӵектосъёс тодмато Россиысь пӧртэм калыкъёслэн аспӧртэмлыкенызы, этносъёс вискысь кусыпъёсты умоято. Тужгес но устоосыз соос пӧлысь VI Россиякуспо тужгес но усто муниципал практикаосъя йӧскалык кусыпъёс удысын вожвылъяськонын висъямын вал, 25 вормисьёс пӧлысь куинез проект – Удмурт Элькунысь.

Вожвылъяськонэ Россиысь 73 улосысьтыз 547 заявка вуиз.

«Лучшие практики бюджетных учреждений муниципального, регионального и общероссийского уровней, Домов дружбы народов и Домов национальностей» номинациын Удмуртиысь кык ӵектос вормиз – «Быг-Быг» (0+) IX Йӧскалык сиён-юонъя калыккуспо фестиваль («Быгы» Удмурт лулчеберетъя йӧскалык центр радъя, Быгы гурт, Шаркан ёрос) но «Кылдысинлэн дневникъёсыз» (0+) Глазкарысь устолыкъёсъя 2-тӥ номеро нылпи школа.

«Быг-быг» гастрофестиваль – Россиысь но быдэс дуннеысь одӥг гинэ луись площадка, отын финн-угор калыкъёслэсь 100 пӧртэм сиён-юонзэс веръяны луэ – удмурт, бесерман, пор, эстон, карел, манси но мукет. Фестивальын кык нунал ӵоже 20 гуръёсын, пуртыосын, вертелъёсын тылскем вылын дугдылытэк сиён пӧрало. Куноос веръяло пӧртэм пушкесъёсын перепеч, табань, тари ӝуклэсь но ӟазег сӥльлэсь лэсьтэм виртырем, кӧжыпог, калягаен сяртчынянь, нӧкыен но тӧдьыгубиен йыды ӝук, шу кисаль. Со сяна, татчы ресторанъёс но пырисько, калык сиён-юонлэсь кухнязэ лыдэ басьтыса, кылсярысь, койык но кырпась сӥльлэсь лэсьтэм солянкаез ньыль-вить минутскын сиыса быдтӥзы. Озьы ик пӧрало вашкала тупатэм-выльдэм рецептъёсъя сиёнэз. Финн-угор калыкъёслэсь сиён-юонзэс выльдытӥсь Юрий Габров фестивальын дасяз сур пушкын небӟытэм ош сюлэмез, вал сӥлез пыжиз но кисло-куслоосты ӵыжатыса дасяз. Фестивальын асьме егитъёс кырӟало, шудонъёс но вожвылъяськонъёс ортчо. Калыккылос но кулинар сям-йылолъёс пыр фестивальлэн куноосыз финн-угор лулчеберетэн ӟечгес тодматско (2023-тӥ арын «Быг-быг»-е 8 сюрс адями вуылӥз). 2024-тӥ арын «Быг-быг» фестиваль 28-29 инвожое ортчоз, та ужрад пыртэмын Удмуртилэн событийной дырпусаз, кудзэ УЭ-ысь туризмъя Агентство кылдытӥз.

Ас калыкеныд тодматскон кылан-буран бордысен кутске, соин ик «Кылдысинлэн дневникъёсыз» ӵектос-вормисьлэн авторъёсыз лыдӟисьёссэс удмурт лулчеберетлэн одӥгез люкетаз муромытыны малпазы – выжыкылъёс, дауркылъёс но мифъёс пушкы пыртӥзы. «Кылдысинлэн дневникъёсыз» – серемтусъёсын книга удмурт, ӟуч но англи кылъёсын. Отчы печатламын Глазкарысь устолыкъёсъя 2-тӥ номеро нылпи школаысь пиналъёслэн ужъёссы.

Авторъёслэн гожтэмзыя, егитъёслы сям-йылолъёсты но лулчеберетэз утён но возён понна туж кулэ луись луэ ас калыкедлэн кылыз. Кылэз утьыны, азинтыны, вӧлмытыны кулэ. Соин ик книгалэн кыкетӥ люкетэз удмурт кылын гожтэмын, дублировать каремын.

«Лучшие практики органов государственной власти» номинациын «Семьи Удмуртии – гордость России» (0+) фестиваль вормиз. Со 2023-тӥ арын Ува ёросын ортчытэмын вал.

Та ёроскуспо фестиваль паймымон ужрад луэ, кудӥз УЭ-ысь пӧртэм йӧскалыкъем семьяосты огазея. Ӵектос юрттэ Россиын улӥсь котькуд калыклэсь этнокультура удысысь аспöртэмлыксэ, историзэ, сям-йылолъёссэ утьыны но вӧлмытыны. Со ваньмыз «Культура» йӧскалык проектлэн, кудзэ кичӧлтӥз Россия Федерацилэн Президентэз Владимир Путин, быдэстоно азьмугъёсызлы юрттэт луэ.

Фестивале пыриськисьёс дасяллязы йӧскалык шӧмъем номеръёс пӧртэм удысъёсын: кырӟанын, эктонын, чеберлыко литератураын. Соос пыр йӧскалыкъёслэсь узырлыксэс, сям-йылолъёссэс адӟытӥзы.

Ӵектос бадӟым гала-концертэн йылпумъяськиз, отын пӧртэм ёросъёсысь 18 семья асьсэ йӧскалыкъёссылэсь лулчеберетъя узырлыксэз возьматӥз. Яркыт дӥсьёсынызы, аспӧртэмлыко чузъяськонэнызы паймытӥзы.

Пусъёмы, VI Россиякуспо тужгес но усто муниципал практикаосъя йӧскалык кусыпъёс удысын вожвылъяськон ортчиз Россия Федерациысь Президент бордысь йӧскалык кусыпъёсъя Советлэн, Йӧскалык ужъёсъя Федерал агенстволэн но РФ-ысь Мерлык палаталысь йӧскалык но вӧсьбур кусыпъёсъя, миграция Комиссилэн юрттэменызы. Вожвылъяськонлэн ужпумез – юрттэт сётон сыӵе практикаослы, кудъёсыз Россиысь калыкъёс вискын эшлыко кусыпъёсты юнматонлы сӥземын.