25-тӥ инвожое Сюмси ёросысь Пӧбья гурт вӧзын ортчоз удмурт калыклэн «Гербер» Элькун шулдыръяськонэз.

Герберез ортчытон инты огшоры гинэ быръемын ӧвӧл. Самой та ӵыдонтэм шулдыр интыосы куке но улыны интыяськизы Калмез удмуртъёс. Татын вашкалаосмы пойшуразы, муш утизы, ю-нянь будэтӥзы. Пеймыт нюлэс соослэн дорзы но, сюдӥсь-вордӥсьсы но луиз. Самой таин ик геӟаськемын туэ Герберлэн ортчытон радзы но. Шулдыръяськонлэн пуштросэз удмуртъёсын сӥлы карон писпуос котырын кылдытӥськоз. Тӧдьы кызьпу, горд пужым но сьӧд кыз сцена вылэ ӝутскозы. Валтӥсь режисерлэн П.Поздеевлэн ӵектэмезъя, Герберлэн куд-ог площадкаосызлэн нимъёсыз но писпуэн, нюлэсэн герӟаськемын луозы. Шулдыръяськонлэн программаез куиньлы люкиськоз: вӧсяськон, шулдыръяськон, гурт удысын азинлыко ужасьёсты пусъён.

Куноос понна 15 площадкаос чакламын. «Гербер», котькыӵе удмурт шулдыръяськон сямен ик, «Куно пумитанэн» кутскоз. «Тӧршор» валтӥсь сцена вылын шулдыръяськонэз сиё-дано усьтон, музъем ужасьёсты данъян ортчоз, куноосты шулдыртозы элькунысьтымы фольклор коллективъёс. Бӧрысь та сцена вылын ик интыяськоз мукетыз площадка – «Нюлэс гур». Татын быгатонъёсынызы паймытозы элькунысьтымы но мукет улосъёсысь профессиональной но самодеятельной коллективъёс, нимаз кырӟасьёс.

Нош кыӵе Гербер вӧсям ӝуктэк? Та вашкала йылол «Мудор» плщадкаын ортчоз.

Удмуртилэн ёросъёсызлэсь, Россилэн мукет улосъёсаз улӥсь удмуртъёслэсь делегациоссэс, кунгож сьӧрысь лыктэм куносты утялтозы «Кунокуаын».

Кибашлыослэн ужъёссынызы адӟытон-вузкарон радъяськоз «Усточикар» площадкаын. Нош «Вузкаронни» площадкаысь басьтыны луоз сиён-юон но мукет товар.

Пичи куноос понна калык шудонъёс но ӵошатсконъёс радъяськозы «Пичи Гербер» площадкаын.

Удмурт батыръёстэк шулдыръяськон бездыт луысал. Таос кужымзэс эскерозы «Батыр шудонъёс» площадкаын.

Туэ шулдыръяськонэ трос гинэ выль ужрадъёс пыртэмын. Выльёсыз пӧлысь одӥгез площадка – «Эмъяськонни». Татын эмъюрттэт сётозы, озьы ик мылкыд карисьёс мертаны быгатозы давленизэс, секталазэс. Татын ик аутотренинг ортчыны, пӧртэм турынъёсын чай оскалтыны, массаж лэсьтытыны, ческыт зынъёсыны йӧнатиськыны луоз.

«Кышкасьтэмъёс» – тазьы нимамын МЧС-ысь ӧнерчиослэн площадказы – тылпуэн нюръяськонэн но солэсь утиськон ужрадъёсын тодматозы.

Мунчоез яратӥсьёс понна ужалоз «Веник керттон» площадка. Татын веникез пӧртэм турын-куаръёсын сураса тазалыклы эшшо но пайдалыко карыны дышетозы.

Вашкала дыръя сямен ик удмурт эктонъёсты тыпыртозы но быгатӥсьтэмъёсты дышетозы «Эктон возь» вылын.

«Кырӟан бусыын» чузъяськозы калык но авторен гожтэм шулдыр кырӟанъёс. Нош ӝыт «Шундэктон» площадкаын вань куноослы егит, задор мылкыд кузьмалозы «Шундыоос».

Котьку сямен ик ужалозы пӧртэм площадкаос, удмурт усточиослэн киужъёсынызы вузкарон-адӟытон радъяськоз

Удмуртиын Гербер элькун шулдыръяськон чотын 1992-тӥ арысен радъяське. Солэн валтӥсь ужпумъёсыз – удмурт калыклэсь аспӧртэмлыксэ утён, каръёс но ёросъёс вискын кусыпъёссэс юнматон но палэнын улӥсь удмуртъёсын вачеужанэз азинтон .

Кызьы мыноно Гербере?

Кык сямен мыныны луонлыкты вань:

1. Нырысетӥез – Шор автовокзалысь «Ижкар-Пӧбья-Ижкар» маршрутэ билет басьтоно. Огъя дуныз 600 манет.

Ижкарысь потэ 7:30 часэ.

Пӧбъяе вуэ 10:30 часэ.

Пӧбъяысь потэ 16.00 часэ.

Ижкаре вуэ 19.00 часэ.

Билет вузан интыос:

1.ООО «АТП Турист» – М. Горький ур., 68 (ТЦ «Дельфин», 2-тӥ этаж, 18-тӥ бӧлет), т. 674-967, 609-039. Кассалэн ужа котькуд нунал 9:00 часысен – 18:00 часозь. Татын билет 10% -лы дунтэмгес басьтыны луэ.

2. Шор автовокзал, Ижкар к., Красноармейской ур., 134, т. 908-888.

2. Кыкетӥез – этнографической экскурсие пыриськон. Дуныз – 550 манет. Дунэ пыре транспорт, площадкаослэн ужъёсазы пыриськон но страховка. Автобус Ижкарысь (Площадь Оружейников) 8.00 часэ кошке.

Билет азьлапаласен басьтоно.

89501572452

https://vk.com/udmgerber2016