Гербер шулдыръяськон – удмуртъёслэн вашкала сям-йылолзы, кудӥз тулыс бусы ужъёсты йылпумъянэн герӟаськемын. Туннэ нуналъёсы та тужгес бадӟым но кема возьмам нунал. Со быдэсак возьматэ удмурт калыклэсь лулчеберетсэ но сям-йылолъёссэ. Таяз аре удмурт йӧскалык шулдыръяськон 15-тӥ инвожое Шаркан ёросысь Быгы гурт котырын ортчоз! Шулдыръяськонлэн сӥё-дано усьтонэз 11:00 часын кутскоз.

Герберлэн валтӥсь тодметэз луоз гур. Удмуртъёслэн осконъёсазы гур бадӟым инты басьтэ: солэн тӧдьы вылыз тапал, нош сьӧд пушкыз – сопал дуннеез возьмато. Гур коркаез шунтэ, адямиез сюдэ, котыраз быдэс семьяез люканы быгатэ. Удмурт кылын «гур» кыллэн кык пуштросэз: гур – «печь» но гур – «мелодия, песня». Соин ик туэ Гербер ортчоз «Шулдыр! Шуныт! Ческыт!» мереткыл (девиз») улсын.

Со сяна Герберын бадӟым инты басьтозы Шаркан ёрослэн тодметъёсыз: синмаськымон чебер вырйылъёсыз, Тол Бабайлэн юртэз, сиён-юонлы сӥзем «Быг-Быг» фестиваль, сӥё-дано спортсменъёс – Максим Вылегжанин но Владимир Никитин.

Герберын пӧртэм азбаръёс ужалозы: «Куно пумитан», «Вӧсян», «Жингрес возьвыл». Лымшор но уйпал удмуртъёс куспын ортчоз «БОНЫ vs. БЕНЫ» футболъя ӵошатскон. Программаын вылез луоз «Быгыртон» эктыны дышетонъя ужрад – вашкала удмурт эктонъёсты возьматӥсь нылпи дэменлыкъёс.

2024-тӥ ар Семьялэн ареныз юнматэмын, нош гур коркалэсь шунытсэ утись луэ. Удмуртиысь официальной делегациосысь кузпалъёс вискын радъямын луоз «Кутэзлы каб» вожвылъяськон, нош «Пирдан октон» азбарын люкамын луозы нылкышноослэн сюанлы сӥзем йыре нуллонъёссы.

«Егит усточи» азбарын гурт возёс удысысь пинал ӧнерчиос асьсэлэсь тодон-валанъёссэс но быгатонлыкъёссэс возьматозы. «Быг-Быг азбар» площадкаын луонлык кылдоз вашкала кудӟытӥсьтэм варсь юонлэсь пӧзьтэмзэ тодыны. Со сяна Гербер улсын дасэтӥез «Эру» элькун шулдыръяськон ортчоз.

Ужрадэ пыриськыны ӧтисько элькунысь, бускель ёросъёсысь делегациос, удмурт мерлыко огазеяськонъёсысь вань улосчиос но куноос.

Гербер шулдыръяськонлэн радъясьёсыз – УЭ-ысь йӧскалык политикая министерство, Калыкъёслэн Эшъяськон юртсы, «Удмурт Кенеш» огазеяськон но Шаркан ёрослэн администрациез.