Семья йӧскалык Гербер шулдыръяськон, кудӥз туэ Россиысь калыкъёслэн огъя луэмзылэн арез улсын ортче, ВДНХ-ын «Калыкъёслэн эшъяськонзы» нимо куно пумитанъя фестивальлэсь крезьгур программазэ усьтӥз. Праздниклэн куноосыз 30 сюрс пала адями луизы.

Валтӥсь сцена вылын Удмуртилэн азьмынӥсь творчествоя коллективъёс шулдыртӥзы, нош Гербер улсын тематической площадкаос ужазы. Куноос понна удмурт калыклэн киужъёсызъя мастер-классъёс, кибашлыослэн адӟытон-ярмарказы, «Валче» нимо этномарафон, лекциос, кино возьматонъёс но интерактивной программаос радъямын вал. Россия кухнялэн юртаз гастрономической интыос ужазы но творческой коллективъёс шулдыртӥзы. 100-лэсь трос этноволонтёръёс куноослы элькунлэсь лулчеберетсэ но сям-йылолъёссэ тодматыны юрттӥзы. Мастер-классъёслэн площадкаосазы 500-лэсь трос пыриськисьёс вуылӥзы, нош этномарафонын 300-лэсь трос адями пыриськиз.

Куноос Удмуртилэн лулчеберетэныз, сям-йылолъёсыныз, туала улонэныз, промышленной но туризм удысын выль луонлыкъёсыныз тодматскыны быгатӥзы.

Гербер – удмурт калыклэн валтӥсь праздникез, кудӥз возьматэ тулыс бусы ужъёслэсь йылпумъяськемзэс но огазея калыкез огъя шумпотонэн но музъемлы тау каронэн. Кунмылэн шоркараз сыӵе интылы пӧрмиз, кытын улӥсьёс но куноос туала Удмуртиез выль сямен адӟизы – узыр лулчеберетэн, азинскем промышленностен, кужмо дышетон сӧзнэтэн но бадӟым туризмъя луонлыкъёсын элькун.

Ужрад Удмуртиысь Элькун Кивалтэтэн радъямын. Со ортче ВДНХ-лэн но Москваысь Йӧскалык политикая но улосвыл кусыпъёсъя департаментэз юрттэмен, «Калыкъёслэн эшъяськонзы» нимо куно пумитанъя фестиваль улсын.