20-тӥ инвожое Глаз ёросысь Коӵышгурт вӧзын «Гербер» (0+) удмурт йӧскалык шулдыръяськон радъяськиз. Ужрадын Азьмуртлэн грантъёсызъя фондэзлэн юрттэменыз «Наследие Донды – креативные технологии обработки дерева в стиле лэнд – арт» ӵектос улсын кылдытэм арт-объектъёслэн адӟытонзы ортчиз.

Россиысь калыкъёслэн огъя луэмзылэн араз Гербере 15 сюрслэсь трос куноос вуылӥзы быдэс Удмуртиысь, озьы ик Татарстанысь, Башкортостанысь, Пермь, Киров улосъёсысь, Марий Элысь, Москваысь но Санкт-Петербургысь. Элькунысьтымы улӥсьёслэн йӧскалык шулдыръяськонъёсы пыриськемзы лулчеберетэз утёнлы но азинтонлы юрттэ, йӧскалык кусыпъёсты юнматэ, со «Семья» йӧскалык ӵектослэн азьмугъёсызлы тупа.

«Гербер» удалтӥз! Со – удмурт калыклэн валтӥсь праздникез, кудӥз возьматэ тулыс бусы ужъёслэсь йылпумъяськемзэс но огазея калыкез огъя шумпотонэн но музъемлы тау каронэн. Со асьмелэн улонмылэн тодметэз. Котькуд ар ёросъёс сое ортчытон понна вожвылъясько, нош быдэс кунысь куноос эшъёсынызы но лулчеберетэнызы пумиськыны дырто. «Герберлэн» нуналэз катэн юнматэмын – инвожолэн куинетӥ кӧснуналэз. Мон понна та нунал – калыклэн огазеяськемезлэн, вордскем музъемез, ужез но ачиз улонэз яратонлэн тодметэз», – пусйиз Удмурт Элькунысь Кун Кенешлэн Тӧроезлэн воштӥсез – Удмурт Элькунысь Кун Кенешысь тодосъя, дышетонъя но граждан мерлык институтэз азинтонлы юрттэт сётонъя ялан ужась ӧрилэн кивалтӥсез, «Единая Россия» партилэн ёзчиез Татьяна Ишматова.

«Наследие Донды – креативные технологии обработки дерева в стиле лэнд-арт» ӵектос – «ДондыДор – парк живой истории» этно-арт кичӧлтонлэн азьланьтонэз. Нырысь ик эскизъёсъя вожвылъяськон ортчытӥзы, ӧнерчиослэн симпозиумазы укмыс командаос быръемын луизы, соос пӧлысь витез Удмуртиысь, озьы ик санкт-Петербургысь, Свердловск, Пермь улосъёсысь но кунысь мукет улосвылъёсысь пыриськисьёс.

Симпозиуме пыризы пулэсь лэсьтонъя теоретической но практической ужъёс но пуэн ужаны туала амалъёс. Озьы ик ӵектос улсын Удмуртиысь декоративно-прикладной творчествоен вырисьёслы «Традиции и современность» пуэз обработать каронъя креативной амалъёсъя Школа ортчиз.

Тямыс нунал ӵоже 18 кибашлыос но 20 подмастерьёс выль арт-объектъёс кылдытӥзы, соос «Гербер» шулдыръяськонлэн яркыт люкетъёсызлы пӧрмизы но матысь дыре «ДондыДор» парклэсь интывылзэ чеберъялозы. Авторъёс ужъёссэс асьсэос возьматӥзы.