Россиын «Ёлка желаний» нимо ӟечлэсьтон акция кутскиз. Со трос сюрс адямиосты огазея, отын данак ӟеч ужъёс лэсьтыны, быдэс Россиысь нылпиослэсь но мӧйыослэсь мылпотонзэс быдэстыны луэ.

«Ёлка желаний» – Росмолодёжь юрттэм улсын «Движение первых» огазеяськонлэн ӵектосэз. Таяз аре акция 15.11.2023 – 31.03.2024 вакыт ӵоже кыстӥськоз. Шуг-секыт югдуре шедем нылпиос, кудъёсызлы 3-ысен 17 арес тырмемын, та акция дыръя мылпотонзэс улонэ пыӵатыны но Выль арлы кузьым басьтыны быгато. Россиын улӥсьёс пӧлысь 40 сюрслэсь тросэз ини вить ар куспын та акцие пыриськизы, отын 106 сюрс нылпи куронъёсты быдэстыны удалтӥз.

Ас малпанэндэ акцилэн елкажеланий.рф официальной вотэсбамаз гожтыны луэ, администрациен эскерем бере со курон лыдметэ сюроз. Авторизация лэсьтон понна, «Движение первых» вотэсын быдэ вуэмлэн учётной гожтэмез луыны кулэ. Семьяын пиналъёс трос ке, анкетаез котькудзылы нимаз-нимаз гожтыны луэ.

Акцие куинь пумо мылпотонъёс кутӥсько – арберилыко куронъёс (кузьымъёс), арбери луисьтэм куронъёс (ужрадъёс, кытчы нылпилэн пыриськемез потэ), озьы ик кузьым-сюрпризъёс.

Заявкаосты кутон вакытэ умой вылэм, курись муртъёс ас мылкыд каремзыя кыӵе ке ужрадэ пыриськысалзы ке, одӥг яке кӧня ке «ӟеч уж» лэсьтыса, со сярысь вотэсбаме гожтысалзы ке. Кылсярысь, экологи акция ортчытыны, тылобурдоослы сиськонни лэсьтыны яке «Книга другу» акцие пыриськыны.

Мылпотонэз быдэстон ужрадэ огшоры адямиос но, юридик муртъёс но пыриськыны быгато, со понна сайтын регистраци пыр ортчоно. 2023-тӥ аре регистраци усьтӥськоз 1-тӥ толсуре. Анкетаын нимтулэз но телефон номерез гожтоно, нош собере огзэ яке тросгес мылпотонъёсты быръёно, улосвылэз но дунлэсь быдӟалазэ лыдэ басьтыса.

Со сяна, юридик муртъёс быгато нимлыко спонсор луыны, ас коллективысьтызы ужасьёсты ӟечлэсьтон акцие пыриськытыны.

Кин быгатэ «Ёлка желаний – 2024» акцие пыриськыны?

Акцилэн куронъёсызъя, отчы пырисько шуге-леке шедем нылпиос, кудъёсызлы 3–17 арес тырмемын:

– сӧсырмем яке инвалид нылпиос;

– кышкытлык кылдытӥсь висёнэн черлам нылпиос;

– нылпи-сиротаос но анай-атайлэк кылем пиналъёс;

– семьяысь нылпиос, кытын табышсы улыны чаклам дунлэсь ӧжытгес луэ;

– нимысьтыз ожгар операцие пыриськисьёслэн нылпиоссы;

– нылпиос, кудъёсыз уло Донецк но Луганск Калык Элькунъёсын, Запорожской но Херсонской улосвылъёсын.

Кыӵеесь луыны быгато мылпотӥсьёслэн куронъёссы?

Акцилэн куронъёсызъя, мылпотонъёс куинь пумоесь луыны быгато – арберилыко кузьымъёс, арбери луисьтэм кузьымъёс но кузьым-сюрпризъёс.

Арберилыко кузьымъёс 6 категорилы висъясько: книгаос, хобби-тунсыкъёсъя вузъёс, нылпиез азинтӥсь амалъем шудонъёс, дӥськутъёс (20 сюрс манетозь), крезьгур инструментъёс но спорт арбериос (30 сюрс манетозь).

Арбери луисьтэм кузьымъёс пӧлы пыро: «кинэн ке пумиськон» но со доры «ветлон», кыӵе ке удысын («рольын») астэ возьматон, тунсыко интые вуылон. Ужрадъёс Россиын гинэ лэсьтӥськыны быгато.

Кузьым-сюрприз дыръя – мылпотонэз гожтоно ӧвӧл, но пусйыны кулэ, мае яратэ нылпи, кыӵе солэн хоббиез но тунсыкъёсыз.

Кыӵеосыз куронъёс быдэстэмын уз луэ: пӧйшуръёсты, техникаез но смартфонэз курон, озьы ик эмъяськон тӥрлыкъёсты, автомашина яке квартира курон.