4-тӥ куарусёнэ Ижкарын куинетӥ ползэ туала этнокультуралы сӥзем улосвылкуспо “Тангыра” фестиваль ортчиз.

Крезьгуро ужрадлэн валтӥсь меретэз – Россиын улӥсь калыкъёслэн кылынызы кырӟась но фолк-рок öрез азинтӥсь музыкантъёсты Ижкаре люкан.

Фестивальлы кутскон сётӥз эктонъя «Чебеляй» студилэн мастер-классэз. Егитъёс вань мылкыд карисьёсты калык эктонъёслы дышетӥзы. Озьы ик куноослэн луонлыксы вал эшъёссылы яке ӵыжы-выжыоссылы ужрадысь открытка келяны, киын лэсьтэм кузьым басьтыны.

Фестивале пыриськизы: Ижкарысь «KötKubitz» группа, Казаньысь «Карт аяк» фолк-рок коллектив, кудӥз тодмо бигер поэтъёслэн кылъёссыя  гожтэм кырӟанъёсты быдэстэ, Уфаысь башкир кырӟась Филюс Беркет, Чуваш Элькунысь «ЯлАр» коллектив, поръёслэн «У ЕН» этно-панк ансамбльзы но фолк-метал öрез азинтӥсь «GARUDA» удмурт группа.

Фестивальлэн нимысьтыз öтем куноосыз  – Санкт-Петербургысь тодмо «Тролль гнёт ель»  но удмурт «SilentWooGoore» группаос.

Пусйыны кулэ, туэ фестиваль сӥземын вал фолк-рок öрлы, вуоно арны электро-фолк öр валтӥсез луоз.