Сайтысь утчано

Удмурт элькунысь йӧскалык политикая министерство
Сайтысь утчано
Ижкарысь юртлэн борддораз Ашальчи Окилэн портретэз кылдоз
04 April 2022 Иворъёс

Ижкарысь юртлэн борддораз Ашальчи Окилэн портретэз кылдоз

Россиысь Кун Думалэн депутатэзлэн Лариса Бурановалэн кичöлтэмезъя Ижкарысь одӥгаз юртлэн борддораз нырысетӥ удмурт нылкышно кылбурчилэн Ашальчи Окилэн (Акулина Григорьевна Векшина) портретэз кылдоз. Ижкарын та луоз нырысетӥез нылкышно граффити-портрет. «Удмурт нылкышно кенеш» огазеяськонлэн ёзчиосыз эскеризы-кенешизы кыӵе луыны кулэ Ашальчи Окилэн тусыз, со ваньмызлы валамон мед луоз шуыса, марлы бадӟымгес саклык висъяно. Ваньзэ тае лыдэ басьтыса, Ижысь суредась Денис Никонов кык эскиз дасяз. Одӥгаз егит кылбурчи кызьпу вӧзын сылэ. Кыкетӥяз Ашальчи Окилэн кык пӧртэм улонэз возьматэмын: кылбурчи но Быдӟым Атыкай ожысь эмчи. Али Ашальчи Окиез кылбурчиен тодӥськомы, но вунэтоно öвöл Акулина Григорьевналэсь эмчи луэмзэ. Вань улонзэ со сӥзиз син висёнъёсыз эмъянлы, Быдӟым Атыкай ожын ассэ жалятэк сöсырмем солдатъёсты эмъяз.

Ӵектосэз радъясьёс элькунысьтымы улӥсьёсыз тупась эскиз понна куара сётонэ пыриськыны öтё, кудӥз кыстӥськоз 16-тӥ оштолэзёзь. Озьы ик суред борды ватсан понна кылбур чуръёссэ ӵектыны дэмлало. Куара сётыны луэ «Удмурт дунне» газетлэн но «Удмурт нылкышно кенеш» огазеяськонлэн мерлыко огинъёсазы, Лариса Бурановалэн вотэсбамаз, яке «Удмурт дунне» газетлэн редакцияз жингыртыса. Тодады вайытом, ӵектосэз радъя «Удмурт нылкышно кенеш» огазеяськон Ижкар Думалэн тöроезлэн Фарит Губаевлэн юрттэменыз.

Поделиться