1-тӥ оштолэзе УЭ-ысь йӧскалык политикая министр Эдуард Петров пумиськиз удмурт кылын «Удмурт дунне» элькун газетлэн  валтӥсь редактореныз но ужасьёсыныз. Та паймымон адямиос – сӥё-дано журналистъёс, гожъяськисьёс, кылбурчиос, мерлык ужасьёс – ваньзы соос кылъя ӵектосъёсты улонэ вӧлмыто. Газет сяна, соос книгаос потто на, озьы ик бадӟым ужрадъёс ортчытъяло.

Йӧскалык-лулчеберетъя огазеяськонъёслэн ужзы сярысь вераським, со сяна эскерим, кызьы кун кылъёс сярысь программа улонэ пыӵа. Озьы ик министр почётной грамотаосын данъяз газетлэсь кылкутӥсь секретарьзэ Ольга Вахитоваез но корректорзэ Людмила Загребинаез.

«Удмурт дунне» кылдэмез дырысен ик йӧскалык журналистика но литература удысысь ужмуртъёсты дасянъя огазеяськон луэ. Вуоно аре, 4-тӥ тулыспалэ, газетлы 110 ар тырмоз. Ӵапак «Удмурт дунне» газетлэсь нырысетӥ номерзэ печатлан вакыт Удмуртиын Йӧскалык печатьлэсь нуналзэ пусъён нунал луиз.

Газет пӧртэм калыкъёслэсь кусып воземзэс, йӧскалык политикая министерстволэсь ужамзэ мыло-кыдо возьматэ. Нимысьтыз бамъёс потылӥзы на, кудъёсыз элькунамы улӥсь калыкъёслы сӥземын вал.

Тодэ вайытом, «Удмурт дунне» газетлэн валтӥсь редакторез Елена Миннигараева Бадӟым удмурт диктантлы текст дасяз, кудӥз 6-тӥ оштолэзе очной но заочной амалъёсын радъяськоз.