Йӧскалык ужъёсъя федерал агенство (ФАДН) «Тужгес но усто муниципал практика» («Лучшая муниципальная практика») Россиякуспо вожвылъяськонлэсь йылпумъянъёссэ 13-тӥ коньывуонэ 2023-тӥ аре ялӥз – «Калыкъёс вискын эшлыко куспъёсты юнматон, муниципал мертэтъёсъя йӧскалык политика удысын мукет ужрадъёсты радъян» номинацияя.
Вожвылъяськонлэн федерал этапаз вылӥ верам номинацияя Россия Федерацилэн 70 улосвылысьтыз 355 заявка вуиз: 216 заявка I категорияя (муниципал, кар округъёс) но 139 заявка II категорияя (гуртъёс).

Пусъемын, 2022-тӥ арен ӵошатыса, туэ та номинацияя заявкаослэн лыдзы 17%-лы йылӥз. Тужгес но трос заявкаос Приволжской федерал округлэн улосвылъёсысьтыз вуизы – 91.
Заявкаосты сётонъя азьмынӥсьёс луизы: Челябинск (20 заявка), Владимир (13) улосвылъёс, Татарстан Элькун (13), Ленинград улосвыл (12), Ханты-Манскийск автоном округ – ЮГРА (12), Саратов (11), Амур (10 ), Белгород (10), Краснодар (10) улосвылъёс. Федерал этапе нырысьсэ пыриськизы Брянск улосвыллэн муниципал кылдытэтъёсыз.
Вожвылъяськонэз радъясь но ортчытӥсь экспертъёс «Калыкъёс вискын эшлыко куспъёсты юнматон, муниципал мертэтъёсъя йӧскалык политика удысын мукет ужрадъёсты радъян» номинацияя таӵе вормисьёсты пусйизы.

I категория (муниципал, кар округъёс):
– 1-тӥ инты – Грозный кар округ (Чечня Элькун) – «Россиякуспо граждан идентичностез юнматонын но нылпиослэсь но егитъёслэсь патриотизм мылкылдзэс, ас кунзылэсь данлыксэ будэтонын мур радъям уж нуэмзы понна»;
– 2-тӥ инты – Омск кар (Омск улосвыл) – «Омск карез этнокультура но мерлыко интыез сямен азинтон уж нуэм понна но йӧскалык мерлыко огазеяськонъёсын ӟеч кусыпъёс радъям понна»;
– 3-тӥ инты – Рузаевка муниципал ёросысь (Мордовия Элькун) Рузаевка кар улон инты – «Городын улӥсьёсты карлэсь но вордскем шаерзылэсь историзэс эскеронэ мыло-кыдо пыриськем но «Народная память и слава Рузаевки» интерактив музей кылдытэм понна»;
– 4-тӥ инты – Владимир кар округ (Владимир улосвыл) – «Та Вормон Нунал» каркуспо арлы быдэ трос амалъем йӧскалык ӵектосэз улонэ вӧлмытэм понна»;
– 5-тӥ инты – Белев ёросысь Белев кар (Тула улосвыл) – «Улэп суредъёс» но «Улэп киуж-ӧнеръёс» ӵектосъёсты кылдытэм но улонэ вӧлмытэм понна, кудъёсыз ӟуч лулчеберетэз но сям-йылолъёсты утёнлы сӥземын».

II категория (гуртъёс):
– 1-тӥ инты – Успенской ёросысь Убеженской гурт улон инты (Краснодар улосвыл) – «Лулчеберлыко-сӥбур дунлыкъёсты утён но юнматон, кудъёсыз Россия Федерациысь калыкъёслэн семья, лулчеберет, мерлык но история ласянь юн инъетъёссы луо»;
– 2-тӥ инты – Яшкуль гурт муниципал кылдытэт (Калмык Элькун) – «Мерлык кичӧлтонъёслы юрттэт сётэм понна, кудъёсыз сӥземын егитъёслэсь патриотизм мылкыдзэс юнматонлы но этнокультураез улонэ пыӵатонлы»;
– 3-тӥ инты – Кош-Агач ёросысь Кош-Агач гурт улон инты (Алтай Элькун) – «3 кӧчисьёслы но мукет адямиослы, кудъёсыз шуген сюроно кыдёкысь интыосын уло, юрттэт сётонъя ужрадъёс ортчытэм понна»;
– 4-тӥ инты – Петровской муниципал ёросысь Новозахаркинской муниципал кылдытэт (Саратов улосвыл) – «Гуртын улӥсь мордваослэн лулчеберетсылы но улон-вылонзылы сӥзем ивортодэтъя но лулчеберетъя центрез, этнографияя музей но йӧскалык лыдӟетъюрт кылдытэм понна»;
– 5-тӥ инты – Бомнакской сельсовет (Амур улосвыл) – «Эвенкъёслэсь – ӧжыт лыдъем калыклэсь – лулчеберетсэс, сям-йылолъёссэс, ӧнеръёссэс утёнын но улӟытонын бадӟым уж нуэм понна».

10 муниципал, кар округъёс но кар улон интыос пӧлы, кудъёсызлэн вожвылъяськон заявкаоссы тужгес но данак балл люказы, пыризы на: Алексеевской кар улон инты (Татарстан Элькун), Вотка ёрос муниципал округ (Удмурт Элькун), Крестецкой кар улон инты (Новгород улосвыл), Магнитогорск кар округ (Челябинск улосвыл), Октябрьской Кар кар округ (Башкортостан Элькун). Нош 10 гурт улон интыос пӧлы, вормисьёс сяна, пыризы на: Калиновской гурт улон инты (Свердловск улосвыл), Камышлинской ёросысь Камышла гурт улон инты (Самара улосвыл), Усман муниципал ёросысь Пригородной сельсовет гурт улон инты (Липецк улосвыл), Берёзовской ёросысь Саранпауль гурт улон инты (Ханты-Мансийск автоном округ), Троицковихляйской сельсовет (Тамбов улосвыл). Та муниципал кылдытэтъёс Йӧскалык ужъёсъя федерал агенстволэн грамотаосыныз «Народы России» IV Россиякуспо форумын данъетамын.

Вожвылъяськонлэн куронъёсыз юнматэмын 18-тӥ гудырикошконэ 2016-тӥ аре поттэм 815-тӥ номеро Россия Федерациысь Кивалтэтлэн пуктэтэныз; соосты лыдэ басьтыса, Россиысь Йӧскалык ужъёсъя федерал агенство вожвылъяськонлэн федерал этапезлы йылпумъянъёс лэсьтӥз но тужгес но усто муниципал практикаосъя бичет дасяз. Со удысэтлэн официальной вотэсаз «Открытое агентство» ёзэтлэн «Тужгес но усто муниципал практика» люкетаз пыртэмын.

Россиысь Йӧскалык ужъёсъя федерал агенство (ФАДН) 2024-тӥ арын ортчоно ужрадъёслы заявкаос дасянлы методикая юрттэт сётыны дась.