17-тӥ толшоре Калыкъёслэн Эшъяськон юртазы ЭТНО-ПРЕСС-КЛУБ-лэн нырысетӥ кенешез ортчоз.

ЭТНО-ПРЕСС-КЛУБ – со выль площадка, кудӥз огазеялоз калык кусыпъёсты югдытӥсь иворчиосты. Татын соос быгатозы ог-огенызы кенешыны, ог-огзылэсь визь-кенеш юаны, юрттэт курыны, быгатонъёсынызы вошъяськыны, тодон-валанзэс будэтыны.

Нырысетӥ люкаськон сӥземын луоз кыккылолыклы но трос кылъёсты тодонлы. Та темая иворчиосын кенешыны ӧтемын экспертъёс: «Билингва» кыккылолыкъя центрлэн ӧнерчиез, «Билингва. О практиках формирования двуязычия в современной городской среде» ӵектослэн кивалтӥсез, филология тодосъя кандидат Т.Г. Волкова (нялтас вераса, та ӵектос Россия Федерацилэн Президентэзлэсь грантсэ утӥз); «Удмурт нылкышно кенеш» мерлыко огазеяськонлэн кивалтӥсез Н. А. Стапанова, Азербайджанъёслэн «Достлуг» мерлыко огазеяськонзылэн Шаркан ёросысь ёзэтэзлэн кивалтӥсез. Ужрадэ пыриськозы этнотемалы сӥзем вожвылъяськонъёсын вормылэм элькунысьтымы иворчиос.