Калыкъёслэн эшъяськон юртазы шахматъя турнир ортчиз. Ужрад сӥземын вал Владимир Завалинэз, Удмурт Элькунысь йӧскалык политикая министрез, тодэ вайыса, кудӥз ас удысаз 2001–2013-тӥ аръёсы туж азинлыко ужаз.

Элькунын ужрад 2007-тӥ арысен ортче ни, но йӧскалык-лулчеберетъя огазеяськонъёсысь тунсыкчиосты котыраз люка.

Ӵошатсконлэн валтӥсь ужпумез – калыкъёс вискын эшъяськон кусып кылдытон. Таяз аре ӵошатсконэ пыриськизы ог 200 спортсменъёс – 38 команда.

Вань пыриськисьёслы ӟечкылан кылъёсын вазиськиз йӧскалык политикая министр Эдуард Петров: «Ӵошатсконъёс луонлык сёто нош но нош пумиськыны ог-огенымы – йӧскалык командаенымы. Туж шумпотӥсько, шахматъя турнир Владимир Завалинлы сӥземын шуыса, кудӥз ас удысаз 2001–2013-тӥ аръёсы тыршыса ужаз. Оскисько, трос аръёс ӵоже та ужрадмы улоз на шуыса. Туннэ нунал пайдаё мед ортчоз! Мед вормозы тужгес но кужмоосыз!».

Тодэ вайытоно, турнир 16-тӥ ползэ ни «Урарту» Удмуртиысь Армян мерлык огазеяськонлэн Мнацакан Миружанович кивалтӥсезлэн кичӧлтэмезъя радъяське.

«Владимир Николаевич Завалин, кудӥзлы сӥземын та ӵошатскон, удмурт калыклэн дано пиез вал. Озьы ке но, мукет калыкъёслэсь шуг-секытъёссэ умой вала но котьку юрттыны тырше вал. Ӟучъёслы со ӟуч вал, армянъёслы – армянин, грузинъёслы – грузин. Ваньзылы со матысь адями вал. Та калыккуспо шахматъя турнир быдэсак шарая Владимир Завалинлэсь мылкыдзэ, кудзэ со тырше вал милемлы пыӵатыны. Ӵошатсконъёсын валче ми зэмос эшъёс шедьтӥськом. Соин ик шахматэн шудон – эшъяськонэз муромытыны бадӟым луонлык», – пусйиз Мнацакан Миружанович.

16 аресозь пыриськисьёс пӧлын вормисе потӥзы:

1-тӥ инты – Удмуртиысь белорус культурая «Батьковщина» огазеяськонлэн командаез;

2-тӥ инты – Удмуртиысь белорус культурая «Сябры» огазеяськонлэн командаез;

3-тӥ инты – шахматэн шудыны яратӥсьёслэн «Деревенские» нимо командазы.

16 ареслэсь бадӟымгес пыриськисьёс пӧлын вормисе потӥзы:

1-тӥ инты – еврей лулчеберетъя «Ариэль» огазеяськонлэн командаез;

2-тӥ инты – УЭ-ысь бигеръёслэн Улосвыл йӧскалык-лулчеберетъя автономизылэн командаез;

3-тӥ инты – С.Ф. Ощепков нимо шахматъя спорт школаысь команда.