4-тӥ шуркынмонэ, Калыкъёслэн огазеяськон Нуналзылы но Удмуртилэн кунлык басьтэмезлы сӥзьыса, огдышем сямен сяська понӥзы сыӵе синпелетъёс азе, кудъёсыз пуктэмын элькунлы кунлык басьтон понна бадӟым уж лэсьтӥсьёслы – Иосиф Наговицынлы, Трофим Борисовлы но Кузебай Гердлы.

Ужрадэ пыриськизы Вань удмуртъёслэн «Удмурт кенеш» улосвылкуспо мерлыко огазеяськонзылэн азьмынӥсьёсыз, йӧскалык мерлыко огазеяськонлэн, озьы ик «Удмурт нылкышно кенеш»-лэн ёзчиосыз, Кузебай Герд нимо удмурт кун йӧскалык гимназиысь дышетӥсьёс но дышетскисьёс, йӧскалык прессалэн журналистъёсыз, депутатъёс но тросэз мукетъёсыз. Вань люкаськемъёсты ӟечкылаз Удмурт Элькунысь Тӧро но Кивалтэт Администраци кивалтӥсьлэсь ужзэ быдэсъясь Александр Журавлев.

«Элькунлэн дано-буро луись праздникъёсыныз валче – Удмуртилэн кунлык басьтэм но Калыкъёслэн огазеяськон Нуналазы – ваньдэсты тау карисько элькунмы понна ужамдылы но лулчеберетсэ азинтэмдылы. Туала улонын асьмеос но азьланьтӥськомы дано адямиослэсь ужзэс – Иосиф Наговицынлэсь, Трокай Борисовлэсь но Кузебай Гердлэсь. Со луэ асьмелэн огъя ужпуммы, кудзэ ӵошен лэсьтыны кулэ. Юнме шорысь ӧвӧл, Москваын ВДНХ-ын адӟытон-форумын Удмуртилэн стендэзлэн тематикаез элькунысь тодмо но шаермес данъясь адямиослы сӥземын. Улосвыллэн уго тужгес но дуно узырлыкез – со адямиос. «Мы из Удмуртии» стендэз туннэ Тӧро Александр Владимирович Бречалов адӟытэ. Со гид луыны дась ваньзылы, кинъёс асьме доры вуозы. 5-тӥ толсур – та нунал быдэсак элькунмылы сӥземын луоз. Ваньзэсты ӧтисько адӟытонэ вуылыны», – пусйиз Александр Журавлев.

Удмурт Элькунысь Кун Кенешлэн Тӧроезлэн воштӥсез, тодосъя, дышетонъя но граждан мерлык институтэз азинтонлы юрттэт сётонъя ялан ужась комиссиезлэн председателез Татьяна Ишматова вераз:

«Туннэ асьме элькунысь, асьме кунысь эшлыко, трос йӧскалыкъем семья пусъе Калыкъёслэсь огазеяськон Нуналзэс. Тупаса улон, ӟеч бускель кусыпъёс но ог-огдэ гажан – та кылъёс ваньмылэн улонамы бадӟым инты басьто. Соос возьмато: котькудмы ас интыямы бадӟым уж нуыны кулэ, асьме быгатонлыкъёсмес но эшъяськон мылкыдмес утьыны, вордскем музъеммес гажаны но яратыны. Туннэ асьме Элькунмы кунлык басьтэмезлэсь 103-тӥ арзэ пусъе. Кунлык кылдытон понна тыршизы солэн дано пиосыз: Иосиф Наговицын, Трокай Борисов, Кузебай Герд. Соос юрттэмен асьмелэн вордӥськем Юртъермы вань, кудӥзлэн нимыз – Удмурт Элькун. Мон оскисько, солэн котькудӥз улӥсез вордскем шаереныз данъяське. Татын вордӥсько асьме нылпиосмы но нунокъёсмы, татчы озьы ик ӵыжы-выжыосмы ватылэмын, кудъёсыз асьмелы бадӟым узырлык кузьмазы – лулчеберет но сям-йылолъёсты, анай кылъёсты, аспӧртэмлыкмес. Со бадӟым узырлык, кудзэ ваньмы асьмеос утьыны кулэ».

Ужрад кутскиз Удмуртилэн нырысетӥ кивалтӥсезлэн, Вотоблисполкомлэн Президиумысьтыз Председателезлэн, элькунысь зэмос политиклэн но патриотлэн Иосиф Наговицынлэн синпелетэз азе сяська понон бордысен.

Вавож ёросысь кылбурчи, прозаик, драматург, этнограф Кузебай Герд удмурт калыклэн историяз пыраклы «югдытӥсь» нимен пыриз. Со печатлаз даслэсь уно книга – кылбуръёсын но поэмаосын бичетъёс, ӟуч писательёслэсь гожтосъёссэс, озьы ик ӟуч калык выжыкылъёсты но кырӟанъёсты удмурт кылэ берыктӥз. Быдэс улонэз ӵоже Кузебай Герд ӧтись-ӝуткась но агитатор вал – удмурт калыкез выль улон лэсьтыны ӧтиз.

Эмчилэн, тодосчи-кылосбурчилэн, этнографлэн Трофим Борисовлэн улон-вылонэз яркыт учыръёсын но ужъюгдуръёсын паймытэ. 1920-тӥ аръёслэн шоразы со быгатӥз удмурт педагогикая нырысетӥ курсъёсты кылдытыны, нош собере – дышетӥсьёсты дасясь семинариез.

Туннэ нуналэ удмурт лулчеберетлэн но йӧскалык аспӧртэмлыклэн азинсконэзлы, удмурт кыллэсь инлыксэ будэтонлы, удмуртъёслэсь асваланзэс улӟытонлы бадӟым юрттэт сётэ Вань удмуртъёслэн «Удмурт кенеш» улосвылкуспо мерлыко огазеяськонзы, кудӥз 1991-тӥ арын кылдэмын.

«Милям трос проектъёсмы но эсэпланъёсмы чакламын вуонолы. Та ар ми понна юбилейной – Кузебай Гердлэн но Ашальчи Окилэн вордскемзы дырысенызы 125 ар, Иосиф Наговицынлэн – 135 ар. Вань ужрадъёсмы соослы сӥземын. Милям ёзэтъёсмы (отделениосмы) элькунмылэн котькуд ёросъёсаз ужало, озьы ик Россиысь тросаз улосвылъёсын. Ваньзы соос ӵектосъёссэс улонэ пыӵатӥзы кулэлыко ужрадъёс улсын. Кылсярысь, тулыспалэ «Герд лыдӟетъёс» ортчизы. Та ужрад трос мукетъёсызлэсь кутсконзэс усьтӥз. Нош 21-тӥ шуркынмонэ ми йылпумъянъёс лэсьтомы, кудъёсыз югдытӥсьёсмылэн юбилейёссылы сӥземын луозы, соку азьветлӥсьёсты данъеталомы но концерт ортчытомы», – вераз Вань удмуртъёслэн «Удмурт кенеш» улосвылкуспо мерлыко огазеяськонзылэн Тӧроез, Кун Кенешысь депутат, лулчеберетъя, туризмъя но йӧскалык политикая ялан ужась ӧрилэн кивалтӥсез Андрей Ураськин.