10-тӥ южтолэзе Камбарка карын Элькун Вӧйдыр шулдыръяськон (0+) ортчоз. Та сярысь пыр-поч мадиз йӧскалык политикая министр Эдуард Петров брифингын, ивор вӧлмытон ёзэсъёсын пумиськыкуз.

Праздниклэн пусэз луоз кисьмам улмо, со возьматэ яратонэз, кузпалъёслэсь юн герӟетсэс, удалтонлыкез но нылпиослэсь таза луэмзэс. Эдуард Петров верамъя, улмо Камбарка ёрослэн брендэз луэ – шольинской суредан амал (роспись), кудаз ньыль буёл пыре – горд, зарни, сьӧд, вож.

Шолья черкогуртын 1970-тӥ аръёсы леспромхоз усьтӥзы, отын росписья цех ужаз, усточиос пулэсь, керамикалэсь но фарфорлэсь лэсьтэм арбериосты буязы. Самоваръёслы кулэяськон тужгес но бадӟым вал.

Шулдыръяськонлэн «Тёща зятя созывает да блинами с яблочками угощает» тунсыко вожвылъяськон ортчытэмын луоз, отчы быдэс Удмуртиысь варманайёс но соослэн эмеспиоссы пыриськозы. Элькун Вӧйдыр шулдыръяськон Семьялэн арезлы сӥземын, кудзэ 2024-тӥ арлы асьме кунмылэн Президентэз юнматӥз.

Пӧртэм шудонъёс, вожвылъяськонъёс радъямын луозы, такмакъёс (частушкаос) кырӟалозы, ческыт Вӧйдыр сиён-юонъёсын куно карозы. Муниципал кылдытэтъёс асьсэды валтӥсь сценаын возьматозы, «Яблочный перепляс» но «Попади в яблочко» ӵошатсконъёсы пыриськозы.

Ужрадэз радъяло УЭ-ысь йӧскалык политикая министерство, элькунысьтымы Ӟуч лулчеберетъя огазеяськон, Калыкъёслэн Эшъяськон юртсы но Камбарка ёрослэн Администрациез.