1-тӥ толсуре Астраханьын ортчиз казачество ужъёсъя Россия Федерациысь Президент бордын ужась Советлэн кенешонэз. Эдуард Петров ВКС амалэн ужрадэ пыриськиз, соин ӵош вал Удмуртиысь нимысьтыз окружной Верхнекамской казак огазеяськонлэн атаманэз Григорий Гусаров, Россиысь Утиськонъя министерстволэн интывыл ёзэтъёсысьтыз, Россилэн МВД-ысьтыз но МЧС-ысьтыз огмуртъёс, озьы ик казачествоез утись священник.
Кенешонэз усьтыку, Россия Федерациысь Президентлэн юрттӥсез Дмитрий Миронов пусйиз: нимысьтыз ожгар операциез ортчытон выль мылкыд сётӥз Россиысь казачествоез азинтонлы. Трос казакъёс кышкатэк асьме кунмес утё, данакез соос кун наградаосын данъетамын.
Россия Федерациысь Президент бордысь Советлэн Председателез Дмитрий Миронов сётӥз быдэс Россиысь казачество огазеяськонлэсь атаман удостоверенизэ Виталий Кузнецовлы, кудӥз та интыуже РФ-ысь Президентэзлэн Косэтэзъя пуктэмын.
Йӧскалык ужъёсъя Федерал агенстволэн кивалтӥсез Игорь Баринов пыр поч мадиз Россиысь казачество кусыпъёсты азинтонъя кун политикалэн Стратегиез сярысь, отысь 2024-2026-тӥ аръёсы лэсьтоно ужрадъёсъя выль план сярысь.
Выль планэ 70-лэсь трос ужрадъёс пыро, кудъёсыз сӥземын:
– казакъёс пӧлын кун службаез вӧлмытонлы;
– будӥсь пиналъёсты патриотизм мылкыдо будэтонлы но лулпуш-сӥбур дунлыкъёсъя азинтонлы;
– казак лулчеберетэз утёнлы но азинтонлы;
– казачестволы мерлык но экономикая юрттэт сётонлы;
– кунсьӧрын улӥсь казакъёсын калыккуспо герӟет возёнлы.