3-тӥ гудырикошконэ Алабгоын XVII Россиякуспо Спасской ярмарка ортчон дыръя радъяськизы «Казарла» Федерацилэн шашкаен коранъя Нырысетӥ нылкышно ӵошатсконъёсыз. Пӧртэм секыт куронъёсын удысъёсъя асьсэлэсь быгатонлыкъёссэс возьматыны вуылӥзы Москваысь но Москва улосвылысь, Санкт-Петербургысь, Кировысь, Саратовысь, Уфаысь, Ярославльысь, Ижкарысь нылкышноос. Ӵошатскисьёс вожвылъяськон дыръя асьсэды туж усто возьматӥзы, шашкаен кораны но фланкировка лэсьтыны быгатэменызы ваньзэ паймытӥзы. Учкыны люкаськемъёс спортсменкаослы туж зол чабизы. «Казарла» Федерацилэн шашкаен коранъя Татарстан ёзэтэз та ужрадэз яркыт, шулдыр ортчытӥз, ӵошатсконъёслэсь мынон радлыксэ ӟеч утиз.

Та ӵошатсконъёсын куинетӥ интыез басьтӥз Удмурт Элькунамы Ижкарын улӥсь Анна Абрамович. Та вормон – со озьы ик сӥё-дано тренеръёслэн Андрей Яценколэн, Петр Антоняклэн но Максим Исаевлэн бадӟым ужзы, соос «Казарла» Федерацилэн шашкаен коранъя Татарстан ёзэтаз пыро. Шашкаен коранъя устолыклы Анна дышетскыны кутскиз Дэри ёросысь Верхнекамской казак огазеяськон округысь «Казачье Братство» казак мерлыкын. Хуторысь Андрей Порошин атаманлэн урокъёсыз казачкалы та спорт сярысь тодон-валанъёс сётӥзы но лул-сюлэмаз мур пыӵазы. Собере Анна ас быгатонлыкъёссэ тодмо тренеръёс юрттэмен азинтӥз но юнматӥз, «Казарла» Федерацилэн шашкаен коранъя Татарстан ёзэтаз пыриз. Ижкарысь нылкышнолэн бадӟым вормонэз – со эшшо одӥг инъет но оскон, Удмуртиын но «Казырла»-лэсь улосвыл ёзэтсэ усьтыны вакыт вуиз ни шуыса.