15-тӥ толшоре «Книга года на родине П. И. Чайковского» V Улоскуспо фестиваль-вожвылъяськонэ пыриськон понна заявка кутон кутскиз. Ужрад сӥземын книгапоттон но полиграфи огазеяськонъёслы, предприятиослы, ужъюртъёслы, мерлык но мукет огазеяськонъёслы, книгаослэн авторъёссылы но мукетъёсызлы, кин книга поттон ужен выре.
Вожвылъяськонэз УЭ-ысь Йӧскалык лыдӟетъюрт, Йӧскалык политикая министерство, Лулчеберетъя министерство, печатья но ивортодэт вӧлмытонъя Агентство радъяло.
Вожвылъясьлэн азьмугез – Удмурт Элькунысь лыдӟисьёсты вылӥ чеберлыко, мур пуштросо, мерлыклы пайдаё книгаосын тодматон.
Вожвылъяськонлэн ужпумъёсыз:

– книгапоттон удысэз азьланьтон, мерлыко но мур пуштросо книга вузпӧр кылдытон;
– УЭ-ысь мерлыклы пайдаё книгаосын тодматон, тужгес но усто гожтосъёсты вӧлмытон;
– улосвыл лыдӟетъюрт фондэз утён но комплектовать карон, озьы печатлам лулчеберетэз узырмытон;
– книга поттӥсьёслэсь, полиграфи ӧнерчиослэсь, авторъёслэсь но лыдӟет юртъёслэсь ивортодэтъя но кылан-буранъя ӵошен ужанзэс юнматон;
– книгалэсь но лыдӟиськонлэсь ним-данзэ ӝутон.

Вожвылъяськонэ сётӥсько куинь ар куспын но 2024-тӥ аре I кварталэ поттэм книгаос. Тодэ вайытӥськом, ужрадэ кыкетӥзэ пыриськыны уг яра.
Вожвылъяськонлэн номинациосыз:

• «Лучшее художественно-графическое оформление издания»;
• «Лучшее учебное, научное, научно-популярное издание»;
• «Лучшее литературно-художественное издание»;
• «Лучшее издание для детей и юношества»;
• «Лучшее краеведческое издание»;
• «Лучшее издание на языках народов России»;
• «Лучшее издание, подготовленное библиотекой»;
• «Лучшая книга о малой родине» (Удмурт Элькунысь пыриськисьёслы гинэ).

Вылӥ гожтэм номинациосъя быръем книгаослы «Книга года» дано ним сётӥське. Удмурт Элькунысь потэм ужъёс бырйисько «Лучшая книга Удмуртии» дано нимен пусъёнлы.
Котькуд номинациысь лауреатъёслы I, II но III степенё дипломъёс сётозы. «Книга года» но «Лучшая книга Удмуртии» дано ним басьтэм вормисьёсты дипломъёсын но кузьымъёсын пусъёзы.

Заявкаез электрон адресъя ukp@unatlib.org.ru 30-тӥ южтолэзёзь ыстоно. Собере оргкомитетлы кулэ луись ужкагазъёсты почта пыр «Конкурс “Книга года”» пусэн келяно таӵе адресъя: 426011, Ижкар, Совето ур., 11, УЭ-ысь Йӧскалык лыдӟетъюрт яке куръер пыр: Ижкар, Совето ур., 11, УЭ-ысь Йӧскалык лыдӟетъюрт, «Книжная палата» ёзэт. Кулэ луись ужкагазъёс:
– Вожвылъяськонэ пыриськись книга (одӥг экземпляр);
– Печатлам формаен заявка;
– Рецензиос, СМИ-ысь дунъян кылъёс (вань ке).

Герӟаськыны: +7 (3412) 65-22-71 (доб. 121), 8-950-163-28-53 (Светлана Аркадьевна Вордакова).