Интыысь аскивалтон Нуналэз пусъён азьын, Сарапулын 19-тӥ оштолэзе «Земской лыдӟиськонъёс» тодослыко-практической конференция радъяськиз. Ужрадэ улосвыл но муниципал тӧрлык ёзэтъёсысь, тодослыко но музей огазеяськонъёсысь, архив, дышетон, мерлык удысъёсысь ёзчиос пыриськизы. Кенешонын пыр-поч эскеризы, кызьы XIX–ХХ дауръёсы кар но земской аскивалтон азинтӥськиз, кызьы соос туала Россиын ортчем кун реформаосын герӟет кылдыто. Озьы ик пусъемын вал кунмуртъёслэн но мерлык огазеяськонъёслэн интыысь аскивалтон ёзэтъёсты но улосвылъёсты азинтонын кулэлыксы.

Форум «Дача Башенина» чеберлыко-адӟытон комплексын, историяя но шаертодонъя музейын ортчиз. Ужрад Павел Башенилы – купецлы но нюлэс промышленниклы – 155 ар тырмонэн но Прикамье улосвылэз дышетонъя огазеяськонлы 110 ар тырмонэн герӟаськемын.

Конференциез Сарапул кар Администрация, Историяя, кылъя но литературая Удмурт институт, Удмурт кун университет но Сарапулысь музей-заповедник радъязы. Нош кичӧлтӥсез – Владимир Владимировчи Вагин луэ, Центр инициативного бюджетирования Институтлэн кивалтӥсез. Ӵапак Владимир Владимирович мытӥз «Земской лыдӟиськонъёсты» Сарапулын 2022-тӥ аре.

Форумын пусъемын вал, таяз аре пыриськисьёслэн лыдзы шӧдскымон будӥз шуыса. Асьсэлэн эскерон ужъёсынызы тодматӥзы Москваысь, Санкт-Петербургысь, Ижкарысь, Воткакарысь но Сарапул карысь лыктэм куноос. Конференцилэн одӥгез площадкаез «Проблемы археологического исследования исторических городов Урало-Поволжья» темалы сӥземын вал. Отчы Киров, Пермь улосвылъёсысь, Башкортостанысь, Татарстанысь, Екатеринбургысь, Чувашиысь, Челябинскысь, Курганысь, Тюменьысь, Тобольскысь но Ижкарысь усточиос пыриськизы.

Прикамье улосвылэз дышетонъя огазеяськонлэн котырес лыдпусэзлы «Известия Общества изучения Прикамского края» нимо сборник печатлазы но соин ужрад дыръя тодматӥзы. Форуме пыриськисьёслы но радъясьёслы нырысетӥ эксземпляръёсты кузьмазы.

Конференциын висъямын вал кысык юанъёс, кудъёсыз резолюцие пырыны кулэ. Ужрадлэн пумаз Сарапул музейысь ӧнерчиос экскурсия ортчытӥзы.

Сарапулысь музей-заповедниклэн ивортодэтэзъя