УЭ-ысь Кун Кенешлэн юртаз, Анай кыллэн Калыккуспо нуналэзлы сӥзьыса, 27-тӥ «Герд лыдӟонъёс» ортчизы.

Туэ ужрад сӥземын вал мерлык ужасьлэн, кылбурчилэн но публицистлэн Максим Прокопьевлэн вордскемез дырысен 140 ар тырмонлы. «Герд лыдӟонъёсы» пыриськизы Вань удмуртъёслэн «Удмурт кенеш» мерлыко огазеяськонысьтыз ёзчиос, Удмуртиысь но солэн палэнысьтыз (Татарстанысь, Башкортостанысь, Пермь но Курган улосвылъёсысь) дышетӥсьёс, тодосчиос, пиналъёс. Тросэз пыриськисьёс Максим Прокопьев сярысь дасям ужъёссэс шара лыдӟизы.

«Шумпотымон, залэ трос люкаськемын кылтодосчиос но историкъёс, озьы ик егитъёс. Нырысетӥосызлы та адямилэсь улон но творческой сюрессэ эскерон калыклэн лулчеберет узырлыкез шоры выль сямен учкыны юрттэ, кыкетӥосызлы – эшшо одӥг кылбурчилэн ужъёсыныз тодматскыны. Мон ачим но ар пала Удмуртиын улӥсь калыкъёслэсь лулчеберетсэс эскерисько ни. Бадӟым тау шуисько «Удмурт Кенеш» огазеяськонлы та понна, историез но сям-йылолъёсты мургес тодон-валан понна соос та выллем ужрадъёсы ӧтьыло ке», – вераз Кивалтэт Администраци кивалтӥсьлэсь ужзэ быдэсъясь Александр Журавлев.

Конференциын докладъёс чузъяськизы, соос сӥземын вал Максим Прокопьевлэн кун но мерлыко ужамезлы, удмурт литератураын кылдытэм солэн образэзлы. Люкаськемъёс понна чузъяськизы поэтлэн тодмо луэм кылбуръёсыз, нош «Инвожо» фольклор ансамбль Татарстанлэн Кукмор ёросысьтыз удмуртъёслэсь лучеберет аспӧртэмлыксэс возьматӥз. Та вакытэ кылъёсты но лулчеберетъёсты утён (таӵе амалъёсты но лыдэ басьтыса) азьпал радын сылэ, йылолъёс сярысь тодон-валанэз егитъёслы валэктыны юрттэ. Ваньзэ та азьмугъёсты огазея «Культура» нацпроект, кудӥз странамылэн Президентэзлэн Косэтэныз улонэ пыӵатӥське.

Ужрад улсын сӥлы каризы К. Герд нимо йӧскалык премилэсь лауреатъёссэ – 2023-тӥ ар понна. Премиез басьтӥзы Дэри ёросысь Лудорвай школалэн кивалтӥсез Надежда Мерзлякова но Вань удмуртъёслэн «Удмурт кенеш» мерлыко огазеяськонлэн гимнэзлэн одӥгез авторез, Ижын улӥсь Алефтина Корепанова.

Со сяна, анай кыллэн Калыккуспо нуналэзлы сӥзьыса йӧскалык-лулчеберетъя огазеяськонъёслэн огмуртъёссы «Родина – значит вместе!» конструкторен шудӥзы. Со 10 пӧртэм амалъёсын эшъяськон сярысь шудон. Ӵектос Президент лулчеберетъя кичӧлтонъёсъя фондлэн вормисез луиз.