8-тӥ пӧсьтолэзе 2026-тӥ арын Ижкарысь но Удмуртиысь, Глазкарысь, Сарапулысь Ӟуч Православной Черклэн епархиосаз Семьялэн, яратонлэн но осконлыклэн россиякуспо нуналзылы сӥзем сӥё-дано ужрадъёс радъяськизы. Дун-чылкыт Пётрлэн но Феврониялэн праздниксы Россиысь калыкъёслэн огъя луэмзылэн арзы улсын ортчиз, кудзэ кунмылэн Азьмуртэз Владимир Путин 2026-тӥ арын ялӥз.

Элькунлэн шоркараз шулдыръяськонлэн шорсюлмыз Михаил Архангеллы сӥзем кафедрал собор луиз. Вӧсяськонэз кивалтӥз Ижысь но Удмуртиысь митрополит Викторин. Святойёслэн выль мудорзы азьын семьяослэн ӟеч улонзы понна вӧсяськонъёс ортчизы.

Собор дорысь площадьын ог-огенызы кема улӥсь кузпалъёсты данъязы. Митрополит Викторин но Удмурт Элькунысь Тӧролэн но Кивалтэтлэн Администрацизылэн кивалтӥсез Александр Журавлев «За любовь и верность» медальёсын соосты данъетазы.

Данъямъёс пӧлын – протоиерей Андрей Петровлэн но протодиакон Дмитрий Бабиковлэн семьяоссы. Нимысьтыз бакель каронъёс басьтӥз прихожанка Римма Пластинина, со 50 ар кузпалэныз ӵош улэ.

Праздник Калык кырӟанъя но эктонъя «Айкай» удмурт кун театрлэн шулдыртэменыз йылпумъяськиз.

Удмуртиысь оскисьёс Семьялэн россиякуспо парадэз борды итӥськизы.

Ижкарын «Россия – семья семей» лозунг улсын празднике мынон Оружейникъёслэн площадьысенызы Горький нимо парклэн шор сценаозяз кутскиз но Ижкарысь 250 семьяосты люказ. Парад огазеяз трос нылпиё, егит, спортъя но творчествоя семьяосты, озьы ик Ижкар епархиысь священнослужительёслэсь но прихожанъёслэсь семьяоссэс – ваньмыз-ӧвӧлэз 850 адями.

Удмурт Элькунысь йӧскалык политикая министр Эдуард Петров ужрадлэсь бадӟым кулэлыксэ пусйиз трос йӧскалыккуско элькунмы понна: «Семьялэн, яратонлэн но осконлыклэн нуналзы элькунысьтымы вань улӥсьёсты огазея, йӧслыкез но осконэз лыдэ басьтытэк. Юн семья кужмо кунлэн инъетэз но огъя традиционной дунлыкъёсмес утись вал но кыле».

Куинь епархиосын ужрадъёс сюрслэсь уно улӥсьёсты огазеязы, семья институтэз утён удысын лулпуш йылолъёслэсь но кун политикалэсь люконтэм герӟетсэс возьматӥзы.

Туспуктэм: Ижкарысь но Удмуртись епархия.