28-тӥ гудырикошконэ шоркарамы коммерциен герӟаськымтэ огазеяськонъёслэн «Городские сообщества – вектор развития Ижевска» нимо III муниципал форумзы ортчиз.

Татчы париськизы мерлыко огазеяськонъёслэн азьветлӥсьёссы, муниципал но элькун тӧрлык ёзэсъёс, дышетон но лулчеберет ужъюртъёсысь ӧнерчиос, ивор вӧлмытӥсь сӧзнэтъёс. Огъя 250 адми люкаськиз.

Форумлэн меретъёсыз: мерлык но экономика, лулчеберет но дышетон удысъёсысь ужпумъёсыз быдэстон вылысь тӧрлыклэсь мерлыко огазеяськонъёсын ӵошен, кенешыса ужанзэ азинтон.

Пленарной заседаниез усьтӥз Ижкарлэн Тӧроез Александр Ушаков. Со пусйиз форуме малпанъёссэс улонэ пыӵатыны тыршись, небыт сюлэмо адямиос люкаськемын шуыса. «Карез улэп шуыны луэ, куке отын улыны тунысо, куке адямиос асьсэ мылкыдзыя уж шедьто. Тросэз Ижын улӥсьёслэн асьсэлэсь малпанъёссэ улонэ пыӵатэмзы потэ, соолы ӵемысь юртто мерлыко огазеяськонъёс».

Коммерциен герӟаськымтэ огазеяськонъёслэн азьпалан азинтӥськыны луонлыкъёссы сярысь Ижкарысь мерлыко палаталэн кивалтӥсез Людмила Гуляшинова вераз.

Мерлыко огазеяськонъёсты азинтон – тросаз Россиысь улосъёсын одӥгез валтӥсь ӧр луэ. Та юанъя асьсэлэсь малпанъёссэс веразы федерал экспертъёс – «Содействие» фондлэн кивалтӥсез Ксения Мельникова но «Наше будущее» фондлэн экспертэз Анна Брусницына. Соос озьы ик тодматӥзы коммерциен герӟаськымтэ огазеяськонъёслэсь но йӧскалык лулчеберетъя огазеяськонъёслэсь ужъёссэс быдэстон понна ватсаса коньдон басьтыны луонлыкъёсын.

«Межнациональное сотрудничество» доклад лыдӟиз Удмурт Элькунысь йӧскалык политикая министрлэн нырысетӥ воштӥсез Павел Орлов. Со вераз элькунысьтымы огъя йӧскалык югдур сярысь.

Форумын 3 площадка ужаз. Татын эскериськизы таӵе юанъёс: юрттэт сётӥсь фондъёслэн ужзы, мерлыко ужбергатонэз азинтон, пӧртэм лулчеберетъёслэсь вачеужанзэс азинтон.

Туннэ нунал понна Ижкарын ужало даслэсь ятыр юрттэт сётӥсь фондъёс, «Белая трость-2», «Подари завтра!», «Баскетбол для инвалидов-колясочников», «Здоровая семья – счастливые дети», «Школа этнокультурной политики «Выжы» ӵектосъёс быдэстӥсько.

Мерлыклы кулэ луись ӵектосъёсты быдэстон кармес яркытгес, тунсыкогес каре.