Удмурт Элькунысь йӧскалык политикая министерствоысь коллегилэн «О результатах работы Министерства национальной политики Удмуртской Республики по организации работы в сфере социальной и культурной адаптации и интеграции иностранных граждан» нимо кенешонэз ортчиз.

Министрлэн воштӥсез Александр Филатов доклад лыдӟиз, отын со вань ужрадъёсты пусйиз, кудъёсыз министерстволэн кичӧлтэмезъя ортчытэмын вал. Элькунамы вылӥ дышетсконниосысь кунгож сьӧрысь студентъёсын бадӟым уж нуиське. Озьы ик саклык висъяське Удмуртие ужаны лыктэм мигрантъёслы но соослэн семьяоссылы. Ӟуч кылэз дышетон понна юрттэт сётӥське, кунгож сьӧрысь кунмуртъёсын кенешонъёс дырыз дыръя ортчо. Йӧскалык-лулчеберетъя мерлык огазеяськонъёсын этнокультурной школаос ужало, соос шаерамы вуисьёслы адаптация юрттэт сётыны чакламын. Мерлыке поттымон керетонъёс одӥг но ӧй вал. Кенешонэ пыриськизы озьы ик МВД-ысь, мерлык политикая но ужъя министерствоысь, Ижкарысь М.Т. Калашников нимо технической кун университетысь огмуртъёс но УЭ-ысь «Узбекский национальный центр социальной поддержки и развития культуры «Азия Плюс» мерлык огазеяськонлэн кивалтӥсез.

Коллегилэсь йылпумъянзэ минситр Эдуард Петров лэсьтӥз. Со пусйиз, эскероно ужпум туж лэчыт луэ шуыса, та сярысь уго кунмылэн Президентэз Владимир Путин но меӵак эфирын вераз. Ужез азьланьтоно, миграци катрадлыкыкын воштӥськонъёс сярысь кунгож сьӧрысь кунмуртъёслы МВД-ен валче ивортодэт сётъяно, та уже йӧскалык-лулчеберетъя огазеяськонъёслэсь кивалтӥсьёссэс но ӧтёно.