15-тӥ куарусёнэ Удмуртиысь Калыкъёслэн Эшъяськон юртсы пӧрмоз аспӧртэм площадкалы, кытын Россилэн улосвылъёсысьтыз интыя аскивалтэт ёзъёсысь огмуртъёс ог-огзылы асьсэлэн азинсконъёссы, люкам опытсы сярысь вералозы.

«Мир в диалоге» форум пыриськисьёслы луонлык сётоз йӧскалык политика удысысь азинлыко муниципал ужъёсты вань страналы адӟытыны. Куноос, ужъюлтошъёссылэсь люкам опытсэс эскерем сяна, экспертъёслэсь визь-кенеш басьтыны быгатозы. Таӵе паськыт ужрадлэн азьмугез – ёросъёслэн мунициапал кылдытэтъёсысьтызы огмуртъёслэсь тодон-валанлыксэс (компетентностьсэс) будэтон, кудӥз герӟаськемын этносъёс вискысь кусыпъёсты умоятонэн. Форумлэн мукет ужпумез – субъектъёс вискын кун йӧскалык политикаез улонэ пыӵатон кусыпъёсты муромытон.

Форумын эскерет площадкаосъя уж радъямын луоз таӵе темаосъя:

– Этносъёс куспын вачевераськонэз но ӵош ужанэз азинтон удысын Калыкъёслэн Эшъяськон юртъёссылэн луонлыкъёссы;

– Россиысь калыкъёслэн Ассамблеязы – со росиякуспо идентичностез юнматон удысын кужмо мерлыко кивалтос;

– Этнобрендъёс но этносъёс куспын тупаса улон.

«Мир в диалоге» нимо форуме пыриськозы каръёслэн, ёросъёслэн, гуртъёслэн кивалтэтъёсысьтызы ужасьёс. Озьы ик пыриськисьёс пӧлын – дышетон, лулчеберет, егитъёслэн политиказы удысъёсын ужасьёс, кудъёсыз кун йӧскалык политикаез улонэ пыӵатон бордын тыршо. Ваньзы соос асьсэ муниципал кичӧлтэмъёссэс но этнокультурной ужъёссэс адӟытыны дасяло. Оглом форум 200 ӧнерчиосты огазеялоз, соос пӧлын Киров но Новосибирск улосвылъёсысь, озьы ик Саха (Якутия) Элькунысь ужудысчиос.

«Мир в диалоге» форум «Марафон Дружбы» нимо ужрадлэн берпуметӥ вамышез луэ, кудӥз Удмурт Элькунысь Калыкъёслэн Эшъяськон юртсылэн 15 ар тырмонэзлы сӥземын. Сӥё-дано йылпумъяськон 15 часын кутскоз.