7-тӥ толшоре пусйиське православной осконэн улӥсьёслэн валтӥсь праздниксы – Ымусьтон.

Нырысетӥ Ымусьтон уй вӧсяськон ортчиз Воткакарысь выльдэм Благовещенской соборын 7-тӥ толшоре уйин. Божественной литургиез Ижысь но Удмуртиысь митрополит Викторин нуиз.

Пусъёмы, служба азьын ортчиз черкез нырысетӥ вӧсян, та ужрад ини службаосты нуыны луонлык сётэ. Быдӟым вӧсян бергес радъямын луоз.

Сӥё-дано литургие люкаськизы Ижкар епархиысь вӧсясьёс, элькунысь но карысь кивалтӥсьёс, ӟеч уж лэсьтӥсьёс, трос огшоры оскисьёс.

Литургия бере митрополит Викторин ӟечкылаз вань вӧсяськисьёсты храмез усьтонэн но Ымусьтон праздникен.

«Туннэ Святейший Патриарх Христос Спасительлэн Храмаз вӧсяськон дыръя шуиз, Инмар – со югыт. Югыттэк асьмеос улыны ум быгатэ: асьмеос йыромомы, быромы. Куке Благовещенской соборез тупатъяны кутскимы вал, мон котькуддылы вазиськылӥ но вералляй, храм – со но асьме улонмылэн югытлыкез. Тӥ юрттӥды, озьы асьмеос огъя кужымен улӟытӥмы та соборез. Та храмын адямиос Инмарлы осконэз, ас кужымзылы осконэз шедьтозы», – вераз Удмуртиысь митрополит.

Удмуртилэн Тӧроез Александр Бречалов но шаерамы улӥсьёсты Ымусьтонэн ӟечкылаз.

«Вань православнойёсты Ымусьтонэн ӟечкыласько! Таиз Ымусьтон Удмуртиын – аспӧртэм, сое ми Воткакарысь выльдэм Благовещенской соборын пумитаськомы. Асьме элькунын улӥсьёс но куноос табере быгатозы адӟыны вань чеберзэ та интылэсь, кытын кык даур талэсь азьло тодмо ӟуч крезьгурчиез Пётр Ильич Чайковскиез пылатӥзы. Та асьмелэн огъя вормонмы но шумпотонмы, та чылкыт празднике ваньдылы сюлмысьтым тау шуисько – огазеяськемды, оскемды, кылын но ужен юрттэмды понна. Семьяосады тупаса улон, ог-огдэ валан мед улоз, котькуд нунал яратонэн но матысь адямиостэс утёнэн пачылмемын мед луоз», – гожтӥз вотэс бамъёсаз УЭ-лэн Тӧроез.

Тодэ вайытомы, Благовещенской соборез тупатъяны кутскизы 2006-тӥ арысен. Та уже пыриськизы огшоры адямиос, ужбергатӥсьёс но бадӟым предприятиос.

Ымусьтон уй вӧсяськонэз Благовещенской соборын Меӵак эфирын «Удмуртия» телерадиокомпания возьматӥз.