10-тӥ тулыспалэ Удмуртилэн шоркараз – Ижкарын – дасэтӥез «Пельняньлэн калыккуспо нуналэз» (0+)  этногастрономической фестиваль ортчиз, валтӥсь площадкаез Ижкарысь Шор площадь луиз.

Пельнянлы сӥзем арняе но фестивале 40 сюрс адями пыриськиз, нош сиемын вал 11 тонна пельнянь. Таӵе ужрадъёс элькунлэсь туризмъя синмаськымон луэмзэ будэто, соос быдэсак тупало «Туризм и индустрия гостеприимства» йӧскалык ӵектослэн азьмугъёсызлы, кудзэ Россия Федерацилэн Президентэз Владимир Путин кичӧлтӥз.

Пельменьфестэ УЭ-лэн Тӧроез Александр Бречалов но пыриськиз. Со PelmenRun бызьылонын 7 иськем бызиз. Старт азьын со 95 марафонэз бызем Любовь Григорьевна Костенковаен пумиськиз. 65 аресаз со эмсузэр луыса ужа на. Нош тужгес но мӧйез бызьылӥсьлы – Калуга карысь 78 аресъем Валентин Фёдорович Черновлы – Александр Бречалов пельнянь кузьмаз.

400 бызьылӥсьёс  11 толэзьысен 78 аресозь – PelmenRun-ын Россиысь 12 улосвылъёсысьтыз: Удмурт Элькун, Коми Элькун, Татарстан, Башкортостан, Москва но Санкт-Петербург каръёс, Перм, Смоленск, Омск, Оренбург, Краснодар улосвылъёс. Вормисьёслы тазикен пӧсь пельнянь сётэмын вал.

Дасэтӥез «Пельняньлэн калыккуспо нуналэз» этногастрономической юбилей фестиваль семьяосты, огазеяськонъёсты, туркымъёсты, эшъёсты герӟаз ас шуныт пумиськонъёсыныз, мастер-классъёсын, вожвылъяськонъёсын но трос ӟеч ужъёсын.

Пельнянлы сӥзем арняе трос пӧртэм ужрадъёс ортчытэмын вал: мастер-классъёс, Пельняньлэн кубокезлы КВН, кудаз 16 тунсыко командаос пыриськизы, Ижкарысь 30 пала кафеосын но ресторанъёсын  «пельнянь меню», Удмуртиысь дизайнеръёслэн этнопоказзы.

10-тӥ тулыспалэ «Шудо визнан» («Счастливая удочка») тол чорыганъя чемпионат ортчиз Ижкар тыметлэн Зодчий Дудин нимо ярдураз. Быдэс нунал «Пельнянь СЪЕСТ» интыос ужазы. Фестивальлэн уно сэрегъёсаз луонлык вал веръяны пӧртэм пельняньёсты но мукет удмурт сиён-юонъёсты. Тужгес но ӟеч ужбергатӥсьёс асьсэ пельняненызы тодматӥзы.

«Пельняньлэсь салам!» туж тунсыко площадка, кудаз фестивале вуэм куноос быгатӥзы дунтэк бырйыны кельшымон открытка. Со борды марка лякыса но гожтӥськыса, Россиысь пӧртэм улосвылъёсысь матысь адямиоссылы ужрад дыръя ик келязы. 4000 открытка келямын вал Владивостокысен Калининградозь!

Толалтэ шудонъёслэн нуналзы улсын «Олимпийский совет Удмуртской Республики» улосвыл мерлык огазеяськонлэн юрттэменыз ӵужонбол ортчиз. Толалтэ шудонъёслэн нуналзы – «Олимпийская страна» программая Россиякуспо физкультура ужрад, 2015-тӥ арысен ортчытӥське Россиысь Олимпи комитетлэн кичӧлтэменыз. Со дасэтӥезлы Сочиын ортчем XXII толалтэ Олимпи шудонъёслы но XI толалтэ Паралимпи шудонъёслы сӥземын. Ӵужонбол сяна, Пельменьфестлэн куноосыз ГТО сётъязы, биатлонын, кульчо лэзьянын ӵошатскизы но «Испытания от Мастера Теней и старца Фура» спортъя но шулдыръяськонъя квест ортчизы. Отчы 200-лэсь уно адями пыриськиз.

Фестивальын озьы ик егитъёс понна дасям этнокультура интеллектуал но визьбуро ужрадъёс малпамын вал. «Удмуртиысь калыкъёслэн пытьытӥзы» онлайн амалэн турнир ортчытӥзы. Пыриськисьёслы вордскем шаерзылэн историезъя, татын улӥсь калыкъёслэсь сям-йылолъёссыя, но озьы удмурт кылъя тодон-валанзэс возьматоно вал. Визьбуро ӵошатсконэ оглом 65 адями пыриськиз. Нош 50 адями «Удмуртиысь синпель» («СувенирПроУдмуртию») квестэз ортчиз.

«Металлург» лулчеберетъя юртын хэнд-мейд амалэн лэсьтӥськонъя усточиослэн киужъёсынызы но кылдытэм арбериосынызы вузкарон азбар радъямын вал. Фестивальын трос перепеч но табань сиемын вал. Ижкарысь Шор площадьын элькунысь коллективъёс шулдыртӥзы.

«Пельняньлэн калыккуспо нуналэз» йылпумъяськиз «Годовой запас пельменей» фестивальлэн одӥгез партнёрезлэн – «Восточный» Брендлэн – валтӥсь розыгрышеныз. Вормиз Пётр Волков Ижкарысь куамынэтӥ номеро школаысь 9 аресъем дышетскись.