10-тӥ тулыспалэ Ижкарын котькуд ар ортчись «Пельняньлэн калыккуспо нуналэз» этногастрономической фестиваль улсын нырысетӥ тол бызьылон радъяськоз – PelmenRun 2024 (0+). Ӵошатсконъёс ини витетӥ ползэ ортчозы.

Вормисьёслы тазикен пӧсь пельнянь сётэмын луоз, соос озьы ик Пельменьфестлэн партнёръёсызлэсь кузьымъёс басьтозы.

PelmenRun 2024 бызьылонын адямиослэсь арлыдзэс но пӧртэм дасяськем спорт уровеньзэс лыдэ басьтыса, таӵе дистанциос малпамын:

– 500 м (12 аресозь нылпиослы бызьылон);

– 3 иськем (13 аресысен но бадӟымъёслы бызьылон);

– 7 но 21 иськем (дасяськем спортсменъёслы бызьылон).

Озьы ик пыриськыны быгато корпоративъёс – 3*7 иськем бызьылонэ.

Ӵошатсконлэн кутсконэз Ижкар тыметлэн Зодчий Дудин нимо ярдураз радъяськоз (Калыкъёслэн Эшъяськонзы монумент дорын). 3, 7 но 21 иськемлы бызьылон Киров нимо парк пала ярдур кузя ортчоз.

7 но 21 иськемлы дистанцилэн люкетъёсыз Киров нимо паркын луозы. Нылпиослэн 500 метр бызьылонзы – Panorama куноюртозь но берен Зодчий Дудин нимо ярдурозь.

Бызьылонлы регистраци ортчоно таӵе ссылка пыр: https://russiarunning.com/event/ZimniyzabegPelmenRun2024?search_ce=1.

Дасэтӥез «Пельняньлэн калыккуспо нуналэз» этногастрономической юбилей фестиваль 5–10-тӥ тулыспалэ 2024-тӥ аре Удмурт шаерын радъяськоз. Пельменьфест семьяосты, огазеяськонъёсты, туркымъёсты, эшъёсты герӟалоз ас шуныт пумиськонъёсыныз, мастер-классъёсын, вожвылъяськонъёсын но трос ӟеч ужъёсын.

Пельнянь арнялэн аспӧртэмлыкъёсыз пӧлы пыро егитъёс понна дасям этнокультура интеллектуал ужрадъёс: КВН пельнянь кубок, «Родина – значит вместе» шудон, «Шудком» удмурт кылын визьбуро ӵошатскон, нош огшорыосыз дышем ужрадъёс пӧлын – карысь кафеосын но ресторанъёсын «пельменное меню» акция ортчытон но кулинар огазеяськон, кудӥз мастер-классъёслэсь, веръян-шӧмъянъёслэсь но нимысьтыз акциослэсь кылдытэмын луоз. Фестивальын нырысетӥ ползэ «Кибашлы усточиос» («Искусные умельцы») вожвылъяськон радъямын луоз. Нуналлэн пумаз фестивальлэн нимлыко партнёрез радъялоз «арлы дасям пельнянь» нимо шудон.

Таӵе ужрадъёс элькунлэсь туризмъя синмаськымон луэмзэ будэто, соос быдэсак тупало «Туризм и индустрия гостеприимства» йӧскалык ӵектослэн азьмугъёсызлы, кудзэ Россия Федерацилэн Президентэз Владимир Путин кичӧлтӥз.

Пыр-почгес программаен тодматскыны луоз на Пельменьфест вотэс бамын но ВКонтакте группаын.