10-тӥ тулыспалэ Ижкарлэн Шор площадяз «Пельняньлэсь салам!» («Пельменный привет!») акция ортчоз.

Акция Россиысь Почтаен валче ортчытӥське. Фестивале вуэм куноос быгато дунтэк бырйыны кельшымон открытка. Со борды марка лякыса но гожтӥськыса, Россиысь пӧртэм улосвылъёсысь матысь адямиоссылы ужрад дыръя ик келяны луоз. Озьы ик фотозонаын туспуктэм лэсьтыны луоз.

Дасямын куать пӧртэм суредъёсын открыткаос – 4 000 экземпляр.

Акция кыстӥськоз 16:00 часозь, нош берпуметӥ открытка вазьгес келямын луиз ке, площадка дырызлэсь вазьгес ужамысь дугдоз.

Дасэтӥез ортчись «Пельняньлэн калыккуспо нуналэз» этногастрономической юбилей фестиваль 5–10-тӥ тулыспалэ 2024-тӥ аре Удмурт шаерын радъяськоз. Пельменьфест семьяосты, огазеяськонъёсты, туркымъёсты, эшъёсты герӟалоз ас шуныт пумиськонъёсыныз, мастер-классъёсын, вожвылъяськонъёсын но трос ӟеч ужъёсын.

Пельнянь арнялэн аспӧртэмлыкъёсыз пӧлы пыро егитъёс понна дасям этнокультура интеллектуал ужрадъёс: КВН пельнянь кубок, «Родина – значит вместе» шудон, «Шудком» удмурт кылын визьбуро ӵошатскон, нош огшорыосыз дышем ужрадъёс пӧлын – карысь кафеосын но ресторанъёсын «пельменное меню» акция ортчытон но кулинар огазеяськон, кудӥз мастер-классъёслэсь, веръян-шӧмъянъёслэсь но нимысьтыз акциослэсь кылдытэмын луоз. Фестивальын нырысетӥ ползэ «Кибашлы усточиос» («Искусные умельцы») вожвылъяськон радъямын луоз. Нуналлэн пумаз фестивальлэн нимлыко партнёрез радъялоз «арлы дасям пельнянь» нимо шудон.

Таӵе ужрадъёс элькунлэсь туризмъя синмаськымон луэмзэ будэто, соос быдэсак тупало «Туризм и индустрия гостеприимства» йӧскалык ӵектослэн азьмугъёсызлы, кудзэ Россия Федерацилэн Президентэз Владимир Путин кичӧлтӥз.

Пыр-почгес программаен тодматскыны луоз на Пельменьфест вотэс бамын но ВКонтакте группаын.