5–10-тӥ тулыспалэ 2024-тӥ аре Удмурт шаерын радъяськоз котькуд ар ортчись «Пельняньлэн калыккуспо нуналэз» этногастрономической фестиваль. Ужрад ортчоз дасэтӥ ползэ – юбилей ар.

Пельменьфест семьяосты, огазеяськонъёсты, туркымъёсты, эшъёсты герӟалоз ас шуныт пумиськонъёсыныз, мастер-классъёсын, вожвылъяськонъёсын но трос ӟеч ужъёсын. Трос калыкъем Удмуртиысь тужгес но яратоно тол фестиваль 5-тӥ тулыспалэ кутскоз но 10-тӥ тулыспалэ Ижкарысь Шор площадьын йылпумъяськоз.

«Укмыс ар ӵоже ини ми возьматӥськомы: Удмуртия – пельняньлэн вордскем интыез. Элькунлэн та зэмос брендэз, кудӥз сям-йылолъёсты, семьяосты, спортэн вырисьёсты, ӧнерчиосты, лэсьтӥсь-поттӥсьёсты но та сиёнэз яратӥсьёсты герӟа. Дасэтӥезлы «Пельняньлэн калыккуспо нуналэз» юбилей фестивальлы ми эшшо но тросгес тунсыко ужрадъёс дасямы, соин сэрен праздникын котькудӥз аслыз яратоно сэрег шедьтоз. Фестивале пыриськисьёслэн лыдзы арлы быдэ ялан йылэ – 2015-тӥ аре нырысетӥ Пельменьфестэ 25 сюрс пала адями вуиз, соос 1,5 тонна пельнянь сиизы, нош 2023-тӥ тулыспале фестиваль 40 сюрс адями люказ но 11 тонна пельнянь сиемын вал», – УЭ-лэн Тӧроез Александр Бречалов вераз.

Юбилей Пельменьфестлэн ужрадъёсысыз туж пӧртэмесь луозы, трос удысъёсъя ӧръяськозы но турлы темаосты усьтозы.

Ӵыжы-выжыосмылы фестиваль ӵектоз «Мынам семьяе – мынам узырлыке» («Моя семья – моё богатство») туспыктэмъёсын вожвылъяськонэз. Татчы пыриськисьёс вотэсбаме пукто ас семьязылэсь туспуктэмзэ, куке соос пельмень яке ас калыксылэсь сиёнзэс пӧрало, фото бордын тунсыко гожтэм текст луыны кулэ. Вожвылъяськон «Семьялэн Арез»- лы сӥземын, кудзэ Россиысь Президент Владимир Путин юнматӥз.

Семья ужрадъёс пӧлы пырозы на: выжыкылъёсъя но соослы суреданъёсъя ӵошатскон, семьяен лепить карон чемпионат, семьяос куспын квест но мукет шудонъёс.

Арлы быдэ «Пельняньлэн калыккуспо нуналэз» фестиваль ас пыриськисьёссэ удмурт лулчеберетэн но сям-йылолъёсын тодматылӥз. Юбилей ар но сыӵе ик луоз: со тодматоз вашкала но туала удмурт ӧнеръёсын. Россиякуспо но дунне адӟытонъёсын котьку но пусйыло вал удмурт пильыс (ковёр) куисьёсты но соослэсь чебер ужъёссэс. Котькыӵе буёло геометри пужыосын пильысъёс, пужыятскемъёс но озьы ик калык нылкышно дӥськут – ваньзы соос Россиысь калыкъёслэн лулчеберетазы тужгес но узыръёсыз но аспӧртэмъёсыз шуыса дунъясько.

Фестивальын нырысетӥ ползэ «Кибашлы усточиос» («Искусные умельцы») вожвылъяськон радъямын луоз. Ӧнерчиослэсь пӧртэм видео люкамын луоз, кудъёсаз соос асьсэ яратоно ужзы сярысь, солэсь аспӧртэмлыксэ вералозы. Нош 5-тӥ тулыспалысен пӧртэм ӧнеръёсъя мастер-классъёс, экскурсиос но этноадӟытонъёс ортчытӥськозы.

Пельнянь арнялэн аспӧртэмлыкъёсыз пӧлы пыро егитъёс понна дасям этнокультура интеллектуал ужрадъёс: КВН пельнянь кубок, «Родина – значит вместе» шудон, «Шудком» удмурт кылын визьбуро ӵошатскон, нош огшорыосыз дышем ужрадъёс пӧлын – карысь кафеосын но ресторанъёсын «пельменное меню» акция ортчытон но кулинар огазеяськон, кудӥз мастер-классъёслэсь, веръян-шӧмъянъёслэсь но нимысьтыз акциослэсь кылдытэмын луоз.

«Пельняньлэн калыккуспо нуналэз» фестиваль палэнэ уг кельты спорт улонэз – «PelmenRun» бызьылон витетӥ ползэ радъяськоз, вормисьлы тазикен пӧсь пельнянь сётэмын луоз. Собере луозы на тол чорыган, «удмурт квиддич» – ӵужонбол, кудъёсыз 10-тӥ тулыспалэ фестивалез йылпумъян дыръя ортчозы.

Нуналлэн пумаз фестивальлэн нимлыко партнёрез радъялоз «арлы дасям пельнянь» нимо шудон.

Таӵе ужрадъёс элькунлэсь туризмъя синмаськымон луэмзэ будэто, соос быдэсак тупало «Туризм и индустрия гостеприимства» йӧскалык ӵектослэн азьмугъёсызлы, кудзэ Россия Федерацилэн Президентэз Владимир Путин кичӧлтӥз.

Пыр-почгес программаен тодматскыны луоз на Пельменьфест вотэс бамын но ВКонтакте группаын.