27-тӥ шуркынмонэ куатетӥ ползэ ини удмурт кыллэсь Нуналзэ пусъёзы.

Праздник кылдӥз Вань удмуртъёслэн «Удмурт кенеш» улосвылкуспо мерлыко огазеяськонзы кичӧлтэмен. Пумкылъян кутӥзы 2018-тӥ арын Улоскуспо тодослыко-практической конференциын, кудӥз сӥземын вал I Вань удмуртъёслэн съездзылэн 100 ар тырмонэзлы. Со нуналэ элькунысьтымы катрадлыкын удмурт кыллэн инлыкез кун кыл шуыса юнматэмын вал. Кыӵе ужрадъёсы пыриськыны луоз УЭ-ысь улӥсьёслы но куноослы – со сярысь вераз журналистъёслы пресс-конфренциын йӧскалык политикая министр Эдуард Петров.

«Калыклэн кылыз – йӧскалык идентичностьлэн валтӥсь люкетэз. Удмурт кылэз утён но азинтон – со туж кулэ луэ, малы ке шуоно со асьме лулчеберет узырлыклэн валтӥсь люкетэз. Та Нуналлы сӥзем ужрадъёс тодэ вайыто, асьмелы анай кылмылэсь узырлыксэ утьыны кулэ шуыса, егит выжыосмылы сое вӧлмытыса. Бен, асьмеос бадӟым саклык висъяськомы анай кылэз дышетонлы дышетскон ужъюртъёсын, вань мылкыд карисьёслы дунтэк курсъёс ортчытъяськомы. IT-проектъёс ужало – асдышетосъёс, видеолекциос, кылзӥськон программаос, лэсьтэмын удмурт кылэз дышетон понна телефон ватсэтъёс но шудонъёс, озьы ик Яндекс.Навигатор», – вераз Эдуард Петров.

Удмурт кыллэн Нуналэзлы сӥзьыса малпамын ортчытъяны лекциос, адӟытонъёс, интеллектуал но ӝӧквыл шудонъёс, мастер-классъёс, концертъёс, квестъёс но онлайн амалэн акциос. Сям-йылолъёсъя, кыл утёнъя югдытӥсь ужрадъёслэн ортчемзы «Образование» но «Культура» йӧскалык ӵектосъёслэн куронъёсызлы тупало, кудъёсыз Россия Федерациысь Президентэн Владимир Путинэн кичӧлтэмын. Озьы, 21-тӥ шуркынмонэ УЭ-ысь Йӧскалык театрын Вань удмуртъёслэн «Удмурт кенеш» улосвылкуспо мерлыко огазеяськонзы «Ойдо, эше, вераськом» крезьгуро-литература ӝыт ортчытӥз, со сӥземын вал удмурт кылбурчиослы но югдытӥсьёслы Кузебай Гердлы но Ашальчи Окилы 125 ар тырмонзылы, озьы ик удмурт автономиез кылдытӥсьёс пӧлысь одӥгезлэн Иосиф Наговицынлэн 135 ар тырмонэзлы. Та ужрадын соослэн улонзы но ужан сюрессы сярысь докладъёс лыдӟемын вал. Ӝытэз концертэн йылпумъяз кырӟанъя но эктонъя А.В. Мамонтов нимо «Италмас» Академической ансамбль.

27-тӥ шуркынмонэ Карлуд шур кузя пыдын экскурсия радъямын луоз, со нимаське «Инты, кытын удмурт мифъёс вордӥсько» (0+). Экскурсиез отчытоз Калыкъёслэн Эшъяськон юртсылэн методистэз Альбина Иващенко, Карлуд шур котырысь интыос сярысь мадёз, удмурт калыклэн мифологияз мур пырыса. Та нуналэ ик Калыкъёслэн Эшъяськон юртазы «Куартирник»(0+) крезьгур камерной пумиськон ортчоз. Егитъёс гитараен асьсэлэсь крезьсузьетъёссэс кырӟалозы. 29-тӥ шуркынмонэ «Ритмы удмуртского танца» (0+) эктон-шудон программа радъяськоз. «СундучОк» образцовой хореографи ансамбль удмурт калыклэн лулчеберетэныз, калык сямъёсыныз тодматоз, куноосты шудонъёс но эктон мастер-классъёс возьмало. Пыронэз дунтэк, азьло регистраци ортчыны кулэ.

Ужрадъёс, кудъёсыз сӥземын удмурт кыллэн Нуналэзлы, УЭ-ысь котькуд ёросын радъямын луозы. Озьы ик праздникез ортчытозы Россия Федерациысь улосвылъёсын улӥсь удмуртъёслы – Башкортостанын, Татарстанын, Марий Элын, Пермь, Киров но Свердловск улосвылъёсын, Москваын но Санкт-Петербургын. Ивортодэтэн пыр-почгес тодматскыны луоз УЭ-ысь йӧскалык политикая министерстволэн вотэсбамъёсаз.