Калыкъёслэн огазеяськон нуналзы азьын Удмуртиын калыкъёслэн эшъяськонзы сярысь пӧртэм амалъёсын лэсьтэм 10 шудонъёсты адӟытозы.

1-тӥ шуркынмонысен 2-тӥ шуркынмонозь «Ёлочка» егитъёслэн лагерязы УЭ-ысь дышетӥсьёсты но пиналъёсты «Родина – значит вместе!» нимо Элькун интенсив люкалоз. Калыкъёслэн огазеяськон нуналзы азьын – 3-тӥ шуркынмонэ – соос асьсэ кылдытэм шудонъёссэс Калыкъёслэн Эшъяськон юртазы форум-шудонын адӟытозы.

Та ужрад луэ «Родина – значит вместе!» нимо ИгроБум ӵектослэн этапъёсыз, кудзэ Калыкъёслэн Эшъяськон юртсы но «Артэ» этнокультурной дышетон центр быдэсто. Соос утӥзы грант «Движение Первых» – пиналъёслэн но егитъёслэн Россиякуспо мерлыко-кун движенизылэсь.

Коньывуонлэн кутсконаз семинарын, кудӥз ӵектослэсь ужзэ кутскиз, дышетӥсьёс муромытӥзы асьсэлэсь тодон-валанъёссэс – йӧскалыккуспо герӟетъёсты но патриотизмо мылкыд пыӵатон удысъёсты эскеронъя ужрадын. Соос шудон амалъёсын но элькунысь этнос кусыпъёслэн аспӧртэмлыкъёсынызы тодматскизы. Соосын валче ужазы Удмурт кун университетысь историкъёс но кылосбурчиос, шудонлэн практикаезъя ӧнерчиос, ваньзы соос ужало огшоры шудонъёс но этнос кусыпъёсты юнматонъя шудонъёс кылдытон бордын.

Бератаз дышетӥсьёс калыкъёслэн эшъяськонзы сярысь 10 пӧртэм шудонъёслы концепциос лэсьтӥзы – ӝӧквыл, онлайн, дидактической, коммуникативной но визьбур шудонъёслы. Соос чакламын 12-18 аресъем нылпиослы.

Толэзь ӵоже дышетӥсьёс асьсэ дышетон ужъюртъёсазы радъязы пиналъёслэсь командаоссэс но соосын ӵош йылаз-пумаз вуттӥзы ас шудонъёссылэсь пуштроссэс.

«Ёлочка» егитъёслэн лагерязы интенсиве дышетӥсьёс борды школаосысь пиналъёс но итӥськозы. Кык нуналскын люкаськисьёс пыриськозы интерактив лекциосы, шудонлы дышетон уждрадъёсы, квест но квиз амалэн шудонъёсы, шудон конструкторен тодматскозы но секыт кейсъёсты сэрттозы-пертчозы.

Нош 3-тӥ шуркынмонэ форум-шудон бадӟым ужлэсь йылпумъянъёссэ лэсьтӥсь площадкалы пӧрмоз. УЭ-ысь Калыкъёслэн Эшъяськон юртазы люкаськозы шудонъёсты кылдытӥсь пиналъёс, Ижкарысь этнокультурной школаосысь, Луганск но Донецк Калык Элькунъёсысь нылпиос, нимысьтыз ожгар операцие пыриськисьёслэн пиналъёссы. Соос луозы нырысетӥосыз, кудъёсыз проектлэсь емышъёссэ веръялозы.

Со сяна, форуме лыктэмъёслэн луонлыксы луоз «Бадӟым этнографической диктант» быдэс дуннеысь акцие пыриськыны.

Ӵектослэн йылпумъясь люкетэз – Удмурт Элькунысь школаослэн огазеяськонъёссы пӧлын шудон конструкторез эскерон но возьматон, отын «Разговоры о важном» нимо интерактив ужрадъёс ортчозы.

Котькуд шудонлы лэсьтэм методической индылэтъёс дышетӥсьёслы туж умой юрттэт сётозы этносъёс куспысь керетонъёсты быдтон удысын, Россиысь калыкъёслэсь историяя но лулчеберетъя ваньбур-узырлыксэс вӧлмытонын, озьы ик школаын урок но уроке пырисьтэм ужрадъёсты ортчытонын.

Егитъёслэн но нылпиослэн Россиякуспо мерлык кун огазеяськонзы кылдытэмын Россиысь Президентлэн Владимир Путинлэн пуктэтэзъя, учредительной собраниез 20-тӥ пӧсьтолэзе 2022-тӥ аре ортчиз.

Аслэсьтыз нимзэ «Движение Первых» куарасётон пыр басьтӥз егитъёслэн но нылпиослэн Россиякуспо мерлык кун огазеяськонзылэн I Съездаз, кудӥз ортчиз Москваын 18-20-тӥ толсуре. Быръемчиос озьы ик юнматӥзы ужлэсь 12 ӧрзэ но 11 огъя дунлыкъёссэ. Соос пӧлын: «Улон но сӥ-дан», «Патриотизм», «Ӟечлык но зэмбур», «Выльзэ кылдытыса ужан», «Юн семья» но мукет. Пыриськисьёсты огазеясь малпан: «Россиен ӵош луыны», «Адямилыко луыны», «Ӵош луыны», «Дугдылытэк азьлань мыныны», «Нырысетӥосыз пӧлын луыны».

Движенилэн ужез сӥземын: луонлык кылдытыны котькуд ласянь азинсконлы но асбыдэсмонлы, нылпиослы уж удысэз быръёнлы, озьы ик шутэтскон ортчытонлы.

Та движенилэн визылаз пырыны луэ 6 аресысен. Пыриськыны быгато быдэ вуымтэос, покчиёзо, шоръёзо, шоръёзо профессиональной но вылӥ дышетсконниосысь пиналъёс.

Контактъёс: 8 (3412) 63-10-44 – Чурина Татьяна Владимировна, Калыкъёслэн Эшъяськон юртысьтызы муниципал огазеяськонъёсъя ёзэтэн кивалтӥсь, «Родина – значит вместе!» ӵектослэн кивалтӥсез.