14-тӥ инвожое С.М. Киров нимо паркын Удмуртиысь VI Конфессиос куспын спартакиада улсын капчиатлет бызьылонъя ӵошатсконъёс (0+) радъямын луозы. Ужрадлэн азьмугез – спорт пыр конфесси кусыпъёсты юнматыны,  тазалыкез утьыны. Ӵошатсконъёс Россиысь калыкъёслэн огъя луэмзылэн араз улсын ортчо.

Спартакиада быдэс семьяослы спортэн огазеяськыны, тазалыксэз утьыны юрттэ, со «Семья» йӧскалык ӵектослэн азьмугъёсызлы тупа.

«Кылем аре бызьылонъёсы пыриськиз 300-лэсь трос адями – православнойёс, мусульманъёс, иудейёс но старообрядецъёс. Со, зэмзэ вераса, возьматэ милемлы, спорт огазея шуыса. Конфессиос куспын спартакиада  адямиосты огазея, пӧртэм вӧсьбур, йӧскалык но политика тодметъёс шоры учкытэк», — вераз УЭ-ысь йӧскалык политика министр  Эдуард Петров.

Ӵошатсконъёсы пыриськыны ӧтисько Удмуртиысь пӧртэм конфессиосысь оскисьёс дас аресысен.

Капчиатлет бызьылон нимысьтыз забегъёслэсь пӧрмоз. Котькуд забегын 1-тӥ, 2-тӥ но 3-тӥ интыос шараямын луозы.

Нимысьтыз забегъёс сяна, арлыд категориез но дырез лыдэ басьтытэк, семьяослы бызьылон ортчытэмын луоз. Кулэ луоз 1 км бызьылыны.

Заявкаосты sport_vera18@mail.ru электрон почтае 10-тӥ инвожоозь келяно кулэ.

Ужрадлэн радъясьёсыз – Ижкарысь епархия, УЭ-ысь Йӧскалык политикая министерство, Мугор лулчеберетъя но спортъя министерство.

Спартакиадае куинь видъем спорт пыртэмын:

Куасэн бызьылонъёс – 8-тӥ тулыспалэ 2026-тӥ аре,  Г.А. Кулакова нимо спорт комплексын. Оглом 700-лэсь трос адями пыриськиз.

Капчиатлет кросс – 14-тӥ инвожое 2026-тӥ аре, С.М. Киров нимо паркын.

Северной амалэн ветлон – 13-тӥ куарусёнэ 2026-тӥ аре, Драгунов оружейник нимо скверын.

Туспуктэм: Ижкарысь но Удмуртиысь епархия.