5-тӥ куартолэзе Калыкъёслэн Эшъяськон юртэ Удмуртиысь йӧскалык-лулчеберетъя огазеяськонъёс люкаськозы. Татын шашкиосын но кузь нарды шудонъя (12+) ӵошатсконъёс ортчозы. Соос Россиысь калыкъёслэн огъя луонзылэн арезлы но Быдӟым Вормонлэн 81 арезлы сӥземын луозы.

Ужрадэ йӧскалык-лулчеберетъя огазеяськонъёсысь, спорт школаосысь но мукет ужъюртъёсысь адямиос пыриськозы. Та выллем ужрадъёс калык кусыпъёсты умоятонлы, командаен ужанлы, озьы ик тазалык юнматонлы сӥземын. Ваньмыз та «Семья» йӧскалык ӵектослэн ужпумъёсызлы тупало, кудзэ кунмылэн азьмуртэз Владимир Путин юнматӥз.

Турнире котькуд йӧскалык-лулчеберетъя огазеяськонъёсысь шашкиосын но кузь нардыен шудыны 2 адями лэземын. Пыриськисьёс 12 аресыен кутӥсько. Заявкаос нырысетӥ куартолэзёзь elko26@mail.ru  электрон почта пыр яке Калыкъёслэн Эшъяськон юртазы 209-тӥ номеро кабинетын кутӥсько.

Вормисьёсты кубокъёсын, медальёсын но дипломъёсын пусъёзы.

Ужрадэз ортчыто УЭ-ысь Йӧскалык политикая министерство, Калыкъёслэн Эшъяськон юртсы, Удмуртиысь «Достлуг» азербайджан мер центр.

Тодэ вайытом, 4-тӥ оштолэзе Калыкъёслэн Эшъяськон юртазы йӧскалык-лулчеберетъя огазеяськонъёс пӧлын Дартс шудонъя элькун ӵошатскон ортчытэмын вал. Ӵошатсконэ 150-лэсь трос пӧртэм аресъем адями люкаськиз. Соос 23 командае огазеяськизы, соос пӧлын УЭ-ысь йӧскалык-лулчеберетъя огазеяськонъёс, вылӥ дышетсконниосысь ӧнерчиос.