30-тӥ куартолэзе Каракулино ёросысь Ныргында гуртын «Семык» (0+) элькун шулдыръяськон радъямын вал. Ужрад куамынэтӥ ползэ радъяськиз. Ужрад 2026-тӥ арлэн, кудзэ Владимир Путин Россиысь калыкъёслэн огъя луэмзылэн ареныз юнматӥз, яркыт ужрадэз луиз. Со сяна, ужрад гожъясьчилэн, дышетӥсьлэн но мерлыко ужасьлэн Илья Токмурзин-Ломберскойлэн котырес лыдпусэзлы сӥземын.

Семык – пор калыклэн вашкала праздникез, кудӥз гужем вуэмен герӟаськемын. Солэн инъетаз – ӵыжы-выжы, гурт возёс но семья кусып обрядъёс луо.

Пужыятэм ӵушкон – шулдыръяськонлэн валтӥсь тодметэз, со куно пумитанлэн но эшлыко луонлэн пусэз луэ, праздникын ӵыжы-выжыос куспын «эшъяськонлэн сюресэз» луоз .

«Семык» яркыт но тунсыко ортчиз. Лыктэм куноосты мур пуштросо программа но мастер-классъёс возьмазы. Адӟытонын ӧнерчиос ужъёссэс возьматӥзы но мастер-класс ортчытӥзы. «Йоча модыш вер» нылпиослы, «Мари кучедалмаш» пор нюръяськонъёсты яратӥсьёслы, «Рвезе тукым» егитъёслы площадкаос дасямын вал. «Эн мотор, да уста марий ӱдыр» (Самая красивая и умелая марийская девушка) вожвылъяськонлы йылпумъянъёс лэсьтэмын, собере йӧскалык дӥсен дефиле радъяськиз.

Куноосты ӟечкылаз но пумитаз Удмурт Элькунысь йӧскалык политикая министр Эдуард Петров: «Котькудмы асьмеос – огъя трос йӧскалыко Россиысь лулчеберетлэн но калык историлэн люкетэз. Таӵе ужрадъёсы пыриськон тодон-валанэз муромытэ, мукет лулчеберетъёсын, сям-йылолъёсын тодматэ, озьы ик пӧртэм йӧскалыкъёс куспын эшъяськонэз юнматэ но ог-огмез умойгес валаны но тупаса улыны юрттэ».

2,5 сюрслэсь трос адямиос пор калык лулчеберетэн тодматскизы, пор сиён-юонэз веръязы но пӧртэм площадкаосы пыриськизы.

Нунал йылпумъяськиз «Поян илыш-йула – ик оян калык» (Богатые традиции – единый народ) концертэн. Вуоно арын Семык Кияса ёросын ортчоз.

Семык шулдыръяськонлэн радъясьёсыз – УЭ-ысь Йӧскалык политикая министерство, Калыкъёслэн Эшъяськон юртсы, «Удмурт Элькунысь поръёслэн йӧскалык-лулчеберетъя автономизы»,  «Одо Мари Ушем», «Ӱжара» мер огазеяськонъёс но Каракулино ёрослэн администрациез.