6-7-тӥ инвожое Кизнер ёросысь Пор Сарамак гуртын «Семык» (0+) элькун шулдыръяськон ортчоз. Шулдыръяськонлэн сӥё-дано усьтонэз 11:00 часын кутскоз.

Семык – пор калыклэн вашкала праздникез, кудӥз гужем вуэмен герӟаськемын. Солэн инъетаз – ӵыжы-выжы, гурт возёс но семья кусып обрядъёс луо.

Ужрадэ пыриськыны ӧтисько элькунысь, бускель ёросъёсысь делегациос, пор мерлыко огазеяськонъёсысь ёзчиос но куноос. Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

Таизлэн йӧскалык шулдыръяськонлэн валтӥсь тодметэз луоз «Эшъяськонлэн зарни сяськаез» («Золотой цветок дружбы»). Со тодмет бадӟым инты басьтэ Кизнер ёросысь поръёслэн лулчеберетазы. Со «сяська» шундылэн, шунытлэн, югытлэн, тупаса улонлэн но шумпотонлэн тодметэз луэ, озьы ик со узырлыкез, азинсконэз, калык сям-йылолъёслэсь чылкытлыксэ возьматэ.

Туэ Семык 28-тӥ ползэ радъяськоз. Ужрад Атыкай музъемез утисьлэн арез, Быдӟым Атыкай ожын 80 ар Вормонлэн араз но Удмуртилэн 105 ар кунлык басьтэмез тырмон улсын ортчоз.

Лыктэм куноосты мур пуштросо программа возьмалоз: «Марий патыр» (Марийский богатырь) ворогоронъёс понна вожвылъяськон, егитъёслы сӥзем эстафетаос, нылпи шудон программаос, спорт азбар, вал вылын ветлон.

Быдӟым Вормонлы 80 ар тырмонэзлы сӥзьыса Пор Сарамакын Быдӟым Атыкай ожын бырем ожгарчиослэн синпелетсы азе сяська понозы. Программаез азинтозы пор коллективъёс но нимысьтыз кырӟасьёс. Валтӥсь сцена вылын артистъёс быгатонлыкъёссэс возьматозы, номеръёссы патриотизм мылкыдэн муромытэмын луозы.

Со сяна, Кизнер ёрос но дано улӥсьёсыз сярысь экспозиция усьтӥськоз, тунсыко адӟытонъёс, викторинаос дасямын луозы.

Семык шулдыръяськонлэн радъясьёсыз – УЭ-ысь йӧскалык политикая министерство, Калыкъёслэн Эшъяськон юртсы, «Удмурт Элькунысь поръёслэн йӧскалык-лулчеберетъя автономизы»,  «Одо Мари Ушем», «Ужара» мер огазеяськонъёс но Кизнер ёрослэн администрациез.